اسلام آباد۔ 03دسمبر (اے پی پی) بنجائی وزیر حوالکاری، شینکاری، قومی میرات و دودوربیدہ عطاء اللہ تارڑ پارینے کہ تحریک انتشار تینا بے سہبی و خفت ءِ مٹائفنگ کن گولی چلیفنگ نا دروغ انا بیانیہ جوڑ کننگ اٹی ءِ، دا سیکورٹی کارندہ غاتا سم کاری نا ہچ ءُ شاہدی اس پیش کننگ کتور، داہموفکءُ ہرا دروغ آ ریاست ءِ بدنام کیرہ، داتین پہ تین نا جنگ اٹی لگوک ءُ، تینا شرمندگیءِ ڈکنگ کن دا لاش آتیا سیاست کننگ اٹی ءُ، دالاش آک ٹک ٹاک، فیس بک، وٹس ایپ آ ہی ملرہ۔ کبینی 70 تُو انا کم انگا کہول آ بسنے، اسٹاک مارکیٹ اسہ لکھ انا حدآن گدرینگانے، کبینی نا 4.8 درسد آ بننگ حکومت ووزیراعظم نا خواری نا بھرم ءِ۔ سے شنبے نادے آ اہم سیاسی و زرگزرانی امور آ گپ وتران کرسا بنجائی وزیر حوالکاری پارے کہ کبینی 70 تُو انا کم انگا کچ آ بسنے، ہراداہیت انا دلیل ءِ کہ ننا زرگزران شون ہلنگ اٹی ءِ، زرمبادلہ نا کوڑی 11 ارب ڈالر آن گدرینگانے، کنزیومر پرائس انڈیکس ہر تُو شیف ہِننگ ءِ،اسٹاک مارکیٹ اسہ لکھ پوائنٹ آتا حد آن گدرینگانے ، شرح سود کم مرسا 15 درسد و (کیبور) 13 درسدآ بسنے۔ شرح سود کم مننگ آن ملک اٹی زرکاری ٹی ودکی مننگ ءِ۔ بنجائی وزیر پارےکہ وزیراعظم محمدشہباز شریف نا دے و نن خواری و کوشست آتا سوب آن کبینی ٹی کمتی واقع مس۔ نن ڈیفالٹ نا دنگ آن داہند آ سرمسونن، ایم ڈی آئی ایم ایف ہم پاریسس کہ وزیراعظم محمد شہباز شریف اگہ دا باندات ءِ سنجیدہ ہلتوکہ تو ملک انا ڈیفالٹ آن بچنگ ممکن الوکہ۔ اوپارے کہ اسہ سیاسی جماعت اس آئی ایم ایف ءِ چٹھی اس نوشتہ کرے و ملک ءِ ڈیفالٹ کرفنگ نا کوشست کرے۔ اوپارے کہ الحمداللہ! اینو کبینی 4.8 درسد، شرح سود 15 درسد، زرراہی تس 8.8 ارب ڈالر، زرمبادلہ نا کوڑی 11 ارب ڈالر مسنے، شونداری نا چرجوئی برجاءِ، انشاء اللہ زرگزرانی شونداری ٹی پین گچینی بریک۔ وزیرحوالکاری عطاء اللہ تارڑ پارے کہ تحریک انتشار گولی چلیفنگ نا دروغ انا بیانہ جوڑ کننگ ءِ، تحریک انتشار والااسہ شاہدی اس تو پیش کے ہراٹی کانود نافذ کروک آ ادارہ غاتا کارندہ اس سم کاری کرسا خننگے۔ اوفتے تون اسہ ویڈیو اس ہم شاہدی کن ساڑی اف، دُن ءُ ہچ ءُ واقعہ اس پیش بتنے ہرانا بارواٹی داشاہدی اس پیش کننگ کیر۔ اوپارے کہ اسہ بندغ اسے نا نرنگ نا ویڈیو مو ن آ بس، ہراٹی اوپاننگ ءِ کہ گولی چلینگ انگ ءِ و اوڑتواوار پاننگ ءِ کہ کنے گولی اس لگا، داوڑنا سنسنی تالان کننگے تو ویڈیو وائرل تو مریک، ہندا بندغ اسہ پین ویڈیو سے ٹی پاہک کہ کنے دُوٹھپ مسنے ، اوتینا دُوآن پٹی ءِ دڑفک تو ہچ ءُ ٹھپ اس خننگپک، داہموفک ءُ ہرادروغ آ ریاست ءِ بدنام کیرہ۔ بنجائی وزیرپارے کہ پی ٹی آئی لاش آتیا دروغ تالان کننگ ءِ، دروغ انا بیانیہ اس چلیفنگ انگ ءِ، کس اس پاننگ ءِ کہ داڑے چار ہزار لاش ءُ، کس اس چارسد و کس اس 60 لاش آتا ہیت ءِ کننگ ءِ، لطیف کھوسہ پارے کہ اونا اُراٹی چندی لاش آک ساڑ ی ءُ، تحریک انصاف نا چیئرمین بیرسٹر گوہر پارے کہ غٹ غلط ءُ 12 لا ش ءُ، داہروڑنا قوم انا مسخرہ کننگ انگ ءِ،لاش اسٹ اس ہم اف، مسکہ تو مون آ خننگارہ، دالاش آک ٹک ٹاک، فیس بک، ایکس ، وٹس ایپ آ ہی ملرہ۔ اوپارے کہ قوم اتون مسخرہ کننگ انگ ءِ، قوم انا بدبختیءِ کہ داوڑنا مخلوق سیاسی جماعت جوڑ کیرہ ہرافتے ہچ ءُ عقل و فہم اس اف۔ وزیر حوالکری پارے کہ پولیس و رینجرز نا چار ورنا شہید مسر، اوفتا خاہوت آتون کس اس ہمدردی نا درشانی ءِ کتو۔ اوپارے کہ دا سیکورٹی فورس و پولیس نا ورناتے شست کیرہ، اوکان پد ہوغرہ کہ ننا لاش آک تمانو۔ بنجائی وزیر پارے کہ پی ٹی آئی نوسرباز آتا جماعت ءِ ، اسہ بندغ اس ٹک ٹاک جوڑ کننگ کن کنٹینر آ لگسا نماز خواننگ ءِ ولدا پاننگاکہ اودے شیف بِٹنگا، دابندغ نا زوال مننگ نا دروغ پروپیگنڈا کننگا، دابندغ نا ہم ویڈیو مون آ بسنے، دا منڈی بہاؤالدین نا ہنکینی ءِ و سہی سلامت ءِ، اوپارے کہ اسہ پین بندغ اس ویڈیو کلہو اٹی پاننگ ءِ کہ اونا مار ءِ شہید کننگ ناغلط حوال تالان کننگا،اوتردید کرے و پارے کہ دا فیک نیوز اسے و کنا مار اُراٹی ءِ۔ اوپارے کہ تحریک انصاف نا دا بیانیہ ٹی ہچ ءُ راستکی اس اف۔ بنجائی وزیر پارے کہ انت دنیاٹی ملک اسے ٹی کلاشنکوف ، ربڑ، بنٹ، خل، گرینیڈ، سٹن گنز، ٹیئرگیس آن شپ مچی کروک آتے برانز نا موکل تننگک؟۔ وزیرحوالکاری پارے کہ دااسہ ایلو تون لگوک ءُ، اوفتا شش ہفت گروپ جوڑ مسنے۔ اوپارے کہ بیرسٹر سیف کنا پریس کانفرنس نا ورندی ٹی ہیت کرے اودے ای پاوہ کہ چپ ہی کر، بھازانگا ہیت آک ہندن ءُ ہرافتے ای و نی چانہ،اگہ داہیت آ ک مون آ بسر تو شاید نی خیبرپختونخوا حکومت نا ترجمان مفیسہ۔
