کراچی۔ 03 دسمبر (اے پی پی) پیپلزپارٹی نا چیئرمین بلاول بھٹو زرداری معذور بندغ آتا جہانی دے انا وخت آخصوصی بندغ آتیکن جوان و بریبر راج اس جوڑ کننگ نا تینا بدل مفروک عزم انا درشانی ءِ کرینے، 2024نا تھیم ’’معذور بندغ آتا کماشی ءِ سوگو کننگ، جوان وپائیدار آخبت کن ‘‘ ءِ پک کرسا اواسہ گچین ءۃ پاکستان اسے نا جوڑ کننگ اٹ معذور بندغ آتا اہم کڑد و اوفتا خذمت آتے امنا کننگ نا اہمیت آ زور شاغا۔ میڈیا سیل بلاول ہاؤس آن جاری کلہو نا رداٹ چیئرمین پارے کہ اوناجماعت مدام پدسلوک تپہ بشمول معذور بندغ آتا حق انا رکھ اٹی پیش پیش مسنے۔ اوپارے کہ روزگار کن کوٹہ ءِ پک کننگ آن ہلیس شمولیتی تعلیمی پالیسی تا نفاذ اسکان نن مدام معذور بندغ آتے واکدار کننگ و اوفتے راج اٹ بریبرشریدار نا وڑاٹ اوار کننگ کن کاریم کرین۔ بلاول بھٹو زرداری زور شاغا کہ معذور بندغ آتے بریبر وارخواہی فراوان کننگ و السی بنداوی پنجر ، جان جوڑی و تعلیم اسکان رسینگ تننگ بیرہ کانودی زمواری اف بلکن اسہ شونداری پسند راج اسے نا اخلاقی فرض ہم ارے۔ اوپارے کہ ننے دا راجی تعصب و دقیانوسی تصور آتے چٹفنگ نا گرج ءِ ہرا بے بریبری ءِ ودفرہ، ہندن ءُ چاگڑد اس ودی کروئی مریک ہراڑے ہر بندغ شون ہلنگ کے۔ دابارواٹی 2024نا سرحال ءِ پک کرسا اوپارے کہ معذور بندغ آتے نئے بیرہ فیصلہ سازی نا عمل اٹ اوار کننگے بلکن پائیدار آخبت کن قیادت کن ہم واکدار کننگے۔ اوپارے کہ معذور بندغ آتا قائدانہ کڑد اسہ حقی جوان پاکستان اسے نا دوئی کننگ کن اہم حیثیت تخک۔ چیئرمین بلاول بھٹو زرداری سندھ پرسنز ودڈس ایبلٹیز امپاورمنٹ ایکٹ 2018 نا ذکر ءِ کرسا اودے معذور بندغ آتا حق اکن اسہ تاریخی کانود سازی اس گوندا۔ اوداہیت انا درشانی ءِ کرے کہ پیپلزپارٹی غٹ شاری تیکن شمولیت ، بریبرو وقار نا مون آ دننگ نا تینا مشن آ سلوک ءِ تانکہ اسہ شاری اس ہم پائیدار شونداری نا دوئی کننگ آن محروم سلپ۔
