اسلام آباد۔ 03 دسمبر (اے پی پی) وزیراعظم محمد شہباز شریف پارت کرینے کہ دھرنہ غاتیٹی کانود ءِ لتاڑنگ، سرکاری ملکیت آتے نسخان تننگ و کانود نافذ کروک آ ادارہ غاتا کارندہ غاتے شہید و ٹھپی کروک آتے سخت سزاتننگے۔ وزیراعظم آفس نا میڈیا ونگ انا کنڈآن جاری بیان نا رداٹ سے شنبےنادے آ وزیراعظم نا کماشی ٹی اسلام آباد اٹی 24نومبر آ مروک آ دھرنہ غاتیٹی پھسات آتا جاست وپاست کن ٹہیفوک آ ٹاسک فورس انا دیوان اس اڈ ہلک۔ دیوان اٹی وزیرداخلہ سید محسن رضانقوی، وزیر اقتصادی امور احد چیمہ، وزیرکانود اعظم نذیر تارڑ ، وزیراعظم نا سلاہکار رانا ثناء اللہ وایلوبڑزکو آفیسر آک بشخ ہلکر۔ دیوان آن تران کرسا وزیراعظم پارے کہ بے چیٹی تالان کروک آک بیلاروس نا صدر نا پاکستان نا سرکاری دورہ ٹی ملک انا دارالحکومت آ لشکر کشی کریر ہراننکن شرمندگی نا سوب مس۔ وزیراعظم پارے کہ ملک اٹی بے چیٹی تالان کروک آتا برخلاف کانودی کارروائی آ پیش رفت نا ہفتہ وار جاچ ءِ ہلنگک۔ اوپارت کرے کہ دھرنہ غاتیٹی کانود ءِ لتاڑوک ، سرکاری ملکیت آتے نسخان تننگ و کانود نافذ کروک آ ادارہ غاتا کارندہ غاتے ٹھپی و شہید کروک آتے کانود نا رداٹ سخت سزا تننگے۔ اوپارےکہ پاکستان اٹ ساڑی آ دور انا خواست آتا رداٹ جہانی آب انا انسداد فسادات فورس اس ٹہیفنگک، اسلام آباد سیف سٹی ٹی فارنزک لیب اوار کرسا اودے جہانی آب انا رداٹ جوڑ کنگک و اوڑکن غٹ المی وسیلہ غاتے کاریم اٹ اتنگک۔ وزیراعظم ءِ پاننگاکہ موقع واردات آن سلہہ، سم کاری ٹی ملوک آ کارتوس وخول و ایلو شاہدی تے یکجا کننگانے و غٹ شاہدی تے فرانزک کن گدریفنگک،واردات نا وخت آ ساڑی پھساتی تا درستی راستی نا عمل ءِ ہم ترندی اٹ پورو کننگ انگ ءِ، درستی راستی آن پد غٹ پھساتی تے عدالت آتیٹی پیش کننگک۔
