چنیوٹ۔1دسمبر (اے پی پی):فاسٹ نیشنل یونیورسٹی چنیوٹ کیمپس ءَ ہشتمی سالانہ کانووکیشن مراگش برجم دارگ بوت، ایشی ءِ تہا بنجاھی وزیر برائے میری ٹائم قیصر احمد شیخ ءَ مستریں مہمان ءِ بستار ءَ بہر زرتگ ات۔ مراگش ءِ سروکی ءَ ریکٹر فاسٹ نیشنل یونیورسٹی آف کمپیوٹر اینڈ ایمرجنگ سائنسز ڈاکٹر آفتاب معروف ءَ اے موہ ءِ سر ءَ بنجاھی وزیر قیصر احمد شیخ ءَ فاسٹ نیشنل یونیورسٹی چنیوٹ کیمپس ءِ بُن ھشت ایر کنگ ءُ ایشی ءِ دیمروئی ءِ تہ ءَ وتی ھزمت آنی سر ءَ چمشانک دات۔ آئی ءَ گوشت کہ چنیوٹ کیمپس ءَ نودربر آنی تہ ءَ مدام گیشی بوھگ ءَ اِنت ھاسیں رنگ ءَ جنین نودربر آنی کساس ایندگر وانگ ءُ زانگ ءِ ادارگ آنی تہ ءَ چہ گیش اِنت کہ اے مزنیں سوبمندی ءُ چاگردی بدلی ءِ نشانی اِنت۔ آئی ءَ گیش گوشت کہ مرچیگیں روچ ءَ تاں چینیوٹ کیمپس ءَ 4500 ءَ چہ گیش مردین ءُ جنین نودربراں وانگ ءُ زانگ کتگ کہ ایشی ءِ تہ ءَ مزنیں کساسے ءَ ہائیر ایجوکیشن ءِ تہ ءَ مزنیں سوبمندی یے رستگ۔ قیصر احمد شیخ ءَ گوشت کہ گورنمنٹ کالج یونیورسٹی فیصل آباد ءِ چنیوٹ کیمپس ءِ جوڑیشت ھم تیزی ءَ گوں روگ ءَ اِنت، اے منصوبگ ءِ سرجمی ءِ واستہ 190کروڑ کلدار ءِ مزنیں زرّ ایر کنگ بوتگ۔ آئی ءَ اے گپ ءِ ھم ھال دات کہ اے منصوبگ دسمبر 2024 ءَ سرجم ءُ بنگیج کنگ بیت ایشی ءَ چہ چنیوٹ ءِ جغرافیائی ارزشت ءِ سر ءَ تران کنان ءَ بنجاھی وزیر ءَ گوشت کہ اے شہر پنجاب ءِ مرکزی دمگ ءَ ھوار اِنت۔ کہ ایشی ءِ سبب ءَ چہ اد ءَ 18 کروڑ ءَ چہ گیش مردماں تھنا لھتیں کلاک آنی تہ ءَ سر کنگ بیت۔ قیصر احمد شیخ ءَ گوشت کہ چنیوٹ پاکستان ءِ اقتصادی ءُ وانگ ءُ زانگی مرکز ءِ رنگ ءَ سدک بوھگ ءَ انت ایشی ءِ تہ ءَ ورناھیں نسل ملک ءِ دیمروئی ءَ ھاسیں کرد ءَ پیلو کنت۔ اے موہ ءِ سر ءَ ھاسیں مہمان بشیر جان محمد ءَ کیمپس ءِ نودربر آنی واستہ 25لکھ کلدار ءِ مالی کمک ءِ جار جت، ایشی ءِ مول ءُ مراد گریب ءُ مستحقیں نودربر آنی دلبڈی ءُ آھانی وانگ ءُ زانگ ءِ ھرچ ءُ درچ ءَ را کم کنگ اِنت۔ آئی ءَ گوشت کہ اے رنگیں گامگیج آنی وسیلگ ءَ نودربر آنی وانگ ءُ زانگ ءِ چست ءُ ایر آنی تہ ءَ اے سال ءَ 369 نودربر آنی ڈگری گپتگ ایشانی تہ ءَ 350 نودربر ءَ گریجویشن ءِ ڈگری گپتگ، 17 نودربر ءَ ایم ایس ءُ ایم بی اے ءِ ڈگری گپتگ۔ . ایشی ءَ ابید مراگش ءَ میڈل زرتگیں نودربر آنی واستہ یک لکھ کلدار ءِ انعام ءِ ھم جار جنگ بوتگ کہ ایشی ءَ چہ مزنیں کارکردگی ءِ گوما نودربر آنی دلبڈی رس ایت۔ اے مراگش ءَ کمپیوٹر سائنس، سافٹ ویئر انجینئرنگ، الیکٹریکل انجینئرنگ ءُ بزنس ایڈمنسٹریشن ءِ شعبہ ءِ نودربراں بہر زرتگ۔ ایشی ءَ ابید نودربر آنی مات ءُ پت، فیکلٹی ءِ باسک ءُ دگہ مہمان ھم مزنیں کساسے ءَ ھوار بوتگ اَنت کہ ایشی ءَ چہ اے مراگش یک یاتگار ءُ سوبمندیں مراگشے جوڑ بوتگ۔ اے مراگش چنیوٹ ءَ وانگ ءُ زانگ ءِ دیمروئی ءُ پاکستان ءِ وشیں باندات ءِ ھاتر ءَ یک ھاسیں گامگیج اِنت ایشی ءَ چہ نہ ایوک ءَ بنجاھی تک ءَ وانگ ءُ زانگ ءِ کوالٹی گیش بیت بلکیں سرجمیں ملک ءَ وانگ ءُ زانگ ءِ کوالٹی ءِ گہتری ءِ کلوہ ھم دیم ءَ کیت۔
