وفاقی وزیر عبدالعلیم خان ءَ ترکیہ   ءِ سفیر ءَ گوں گند ءُ  نند ءَ گوشت کہ ترکیہ   ءِ گوما یکجائی منصوبگ آنی ھوار سرمایہ کاری ءِ واستہ جوانیں موہ است انت، کاروباری براتی ءَ را سفری آسراتی آنی پجاری ءَ چہ کاروباری چست ءُ  ایر آنی تہ ءَ گیشی بیت

اسلام آباد۔29نومبر  (اے پی پی): سرمایہ کاری، نجکاری ءُ  مواصلات ءِ وفاقی وزیر عبدالعلیم خان ءَ گوشت کہ ترکیہ   ءِ گوما یکجائی منصوبگ آنی ھوار سرمایہ کاری ءِ جوانیں موہ است انت، کاروباری برادری ءَ را سفری آسراتی پجارینگ ءَ چہ کاروباری کار آنی تہ ءَ گیشی بوت کنت۔ آئی ءَ اے گپ ترکیہ   ءِ سفیر عرفان نزیرولو ءَ گوں تران کنان ءَ کت اَنت۔ گند ءُ نند ءَ ترکیہ   ءُ پاکستان ءِ نیام ءَ وت مہ وتی سیادی آنی دیمروئی ءُ جتاجتائیں جیڈھ آنی سر ءَ سرجمی ءَ چار ءُ تپاسی کنگ بوت۔ وزارت نجکاری ءِ رد ءَ گند ءُ نند ءِ ساھت ءَ گپ ءُ تران کنان ءَ وفاقی وزیر عبدالعلیم خان ءَ گوشت کہ دوئیں ملک دوستیں سیادی ءَ را شریکداری ءِ تہ ءَ بدل کنگ لوٹ اَنت۔ آئی ءَ ترکیہ   ءِ سفیر عرفان نزیرولو ءِ گوما وت مہ وتی سرمایہ کاری ءِ دیمروئی ءِ ھوالگ ءَ ھم گپ ءُ تران کتگ ءُ گوشت کہ ترکیہ   ءِ دیمروئی ماڈل جوانیں رنگے ءَ انت ءُ پاکستان ھم اے ماڈل ءَ چہ سیت زورگ لوٹ ایت۔ عبدالعلیم خان ءَ گوشت کہ پاکستان ءَ کمیونیکیشن ءَ ھوار جتا جتائیں شوبگ آنی تہ ءَ سرمایہ کاری ءِ مزنیں ءُ  دلکشیں موہ است انت۔ وفاقی وزیر ءَ گیش گوشت کہ سڑک آنی نیٹ ورک ءَ را گہتر کنگ مزنیں چیلنج اِنت، دیمروئی ءِ مول ءُ  مراد ایوک ءَ شاہراہ آناں یکجا کنگ ءَ چہ سرجم کنگ بوت کنت۔ عبدالعلیم خان ءَ گوشت کہ پاکستان ءُ  ترکیہ   ءِ الس یکیں براتی سیادی ءَ بندوک اَنت، ما یکجائی منصوبگ آنی ھوار سرمایہ کاری ءِ جوانیں آپشن ءَ ترکیہ   ءِ گوما شریک بوھگ ءَ تیار آں۔ آئی ئَ گوشت کہ کاروباری مردمانی سفر ئِ گیش آسانی ئَ بہ بیت ھمنچو وھد ئَ کاروباری چست ءُ  ایر آنی تہ ئَ گیشی بیت۔ عبدالعلیم خان ءَ گوشت کہ مئے کار دوئیں ملک آنی بزنس کمیونٹی ءَ را نزیک کنگ انت، رند ءَ وت ءَ چہ بندات بیت۔ وفاقی سرمایہ کاری ءِ وزیر ءَ گیش گوشت کہ دوئیں ملک آنی کمپنی آناں ترکیہ   ءُ  پاکستان ءَ دلکشیں منافع ءِ ھاترا موہ رسگ لوٹ ایت۔ اے موہ ءِ سر ءَ تران کنان ءَ ترکیہ   ءِ سفیر ءَ گوشت کہ پاکستان ءَ ھمک رنگ ءِ کمک بیت، ءُ  دو نیمگی سرمایہ کاری ءِ واستہ یک زندگ داروکیں ماڈل ءِ رندگیری کنت۔ آئی ءَ گیش تران کت کہ ترکیہ   پاکستان ءِ گوما وتی سیادی ءَ را ادارگی جوڑ کنگ لوٹیت، مئے وت مہ وتی جاور ساز انت، مول ءُ  مراد پدر انت ءُ  منزل ہمیش انت۔