اسلام آباد۔29نومبر (اے پی پی): پاکستان ءَ گوشت کہ فلسطین ءِ اُلس ءِ گوما یکوئی ءِ میاں اوستمانی روچ ءِ سر ءَ فلسطین ءِ اُلس ءِ گوما انصاف، آجوئی ءُ شرپ ءِ شوھازگ ءِ واستہ وتی بے مٹیں یکوئی ءُ کمک ءِ یک رندے پدا پدر کنت۔ دری کارانی کارگس ءِ جارکش ممتاز زهرہ بلوچ ءَ جمعہ ءِ روچ ءَ پریس بریفنگ ءَ گوشت کہ ما فلسطین ءِ راج ءِ وت واجہی ءِ حق ءُ 1967 ءَ پیسر ءِ سیمسر آنی سر ءَ فلسطین ءِ یک آجوئیں ریاست ءِ جوڑ کنگ ءِ سک باز حمایت کن ایں، گوں القدس الشریف ءَ ءِ بستار ءَ آئی ءِ دارالحکومت ءِ رد ءَ ، آئی ءَ گوشت کہ پاکستان لبنان ءَ انوگیں جنگ بندی ءِ معاہدے ءَ را وش اتک کنت ءُ توامیں فریق آناں اقوام متحدہ ءِ سلامتی کونسل ءِ قرارداد 1701 ءِ سرجمی ءَ پاسداری ءُ ایشی ءِ سر ءَ عمل کنگ ءِ لوٹ کنت۔ ترجمان ءَ گوشت کہ ما لبنان ءِ حاکمیت، علاقائی یکوئی ءُ استحکام ءِ حمایت کن ایں ۔ آئی ءَ آماچیں مردم آنی واستہ انسانی کمک ءِ زوتیں ضلورت، آوار جتگیں مردم آناں ایمنیں واتر کنگ ءُ جنجال ءَ چہ آماچیں دمگ آنی نوک جوڑیشت ءِ آسراتی ءِ لوٹ کتگ۔ جارکش ءَ گْوشتگ: ما باور کنیں کہ اے جنگ بندی یک ھاسیں گامگیجے پہ کش ءُ چیل ءِ کم کنگ ءُ دمگ ءَ گیشیں جنجال ءِ دیم ءَ دارگ ءَ۔ پاکستان ءَ امیت انت کہ جنگ بندی ءِ معاہدے ءَ چہ غزہ ءِ پٹی ءُ دگہ مقبوضہ فلسطین ءِ دمگاں ترندیں ءُ بے شرطیں جنگ بندی، غزہ ءِ تہا نسل کشی ءِ ہلاس کنگ ءُ فلسطینی مہلوک ءَ را انسانی کمک ءِ راہ پچ بیت۔
