اسلام آباد۔29نومبر (اے پی پی): وفاقی وزیر تجارت جام کمال خان ءَ گوشت کہ پاکستان ءِ تجارت ءِ دیمروئی اتھارٹی ءِ گوما یکیں ملک ءِ نمائش ءِ تیاری کنگ ءَ انت کہ کاروباری مردم آناں ھاسیں منصوبگ آنی گوما یکجا کنگ بیت۔ ایتھوپیا ءَ ءُ افریقہ ءِ 1.4 بلین مردمانی مزنیں بازار ءَ سر بوھگ ءَ انت۔ وزارت ءِ برجاھیں جار ءِ رد ءَ آئی ءَ اے ھیالانی درشانی جمعہ ءِ روچ ءَ ایتھوپیا ءِ سفیر ڈاکٹر جمال عبداللہ ءَ گوں گند ءُ نند ءِ ساھت ءَ کتگ اَنت۔ گند ءُ نند ءَ ایتھوپیا ءُ گیشیں افریقی مارکیٹ ءِ گوما تجارتی سیادی ءَ را گیش کنگ ءِ ھاترا یک جامع حکمت عملی ءِ سر ءَ ھیال ریچی کنگ بوت۔ وفاقی تجارت ءِ وزیر ءَ مئی 2025 ءَ ادیس ابابا ءَ برجم دارگ بوھوکیں یکیں ملک ءِ نمائش ءِ بندوبست ءُ ایتھوپیا ءِ حکومت ءِ نیمگ ءَ چہ داتگیں کمک ءِ سر ءَ سفیر ءِ ھم منت گپت۔ وزیر تجارت ءَ گوشت کہ نمائش ءَ چہ پیسر سرجمیں ملک ءَ سیمینار آنی لڑ ءِ بندات کنگ بیت ایشی ءِ تہ ءَ دوئیں ملک آنی بزنس کمیونٹی آناں دعوت دیگ بیت۔ ایتھوپیا ءِ سفیر ڈاکٹر جمال عبداللہ ءَ گوشت کہ ایتھوپیا ءُ پاکستان ءِ نیام ءَ ھپتگے ءَ چار بالی گراب بنت۔ لاہور ءُ اسلام آباد ءَ چہ دیم پہ دیمیں بالی گراب زوت بندات کنگ بنت ۔ گند ءُ نند ءِ تہ دوئیں نیمگ ءَ اے اُمیت ءِ درشانی کنگ بوت کہ ادیس ابابا ءَ یکیں ملک ءِ نمائش نہ ایوک ءَ پاکستان ءُ ایتھوپیا ءِ نیام ءَ تجارت ءَ را مھکم کنت بلکیں پاکستانی کاروباری مردم آناں گیشیں افریقی مارکیٹ ءَ گوں ھمگرنچ بوھگ ءِ پلیٹ فارم ءِ بستار ءَ ھم کار کنت۔
