
اسلام آباد۔ 28 نومبر (اے پی پی) وزیراعظم نا کوآرڈی نیٹر جان جوڑی ڈاکٹر مختار احمد بھرتھ پارینے کہ پولن الرجی نا وخت آمون ءِ توننگ ءِ پک کننگ کن تعلقدار محکمہ غاک گچین گام گیج آتے پک کننگ ءُ، شاریک اسلام آباد ءِ الرجی آن پاک کننگ اٹ ننتون تفر۔ وزارت جا ن جوڑی آن جاری بیان نا رداٹ داخیال آتا درشانی ءِ او پنچ شنبے نادے آ تینا کماشی ٹی پولن الرجی ءِ کم کننگ کن پیشگی گام گیج کننگ نا بابت دیوان اٹی کرے۔ دیوان اٹی ڈاکٹر مختاراحمد بھرتھ اسلام آباد آن پولن ودی کروک آ درخت آتا بدلی ان گرج ءِ تالان کرے۔ سی ڈی اے پولن نا کچ ءِ کم کننگ ایف نائن پارک نا علاقہ ٹی کروک آ گام گیج و کوشست آتیان معلومدار کننگا۔ پولن ودی کروک آ کاغدی شہتوت نا درخت آتے کم کننگ کن ریسہ وار ڈٹ ہم پیش کرے۔ ڈاکٹر مختاراحمد بھرتھ پارے کہ پولن الرجی نا وخت آکنٹرولءِ پک کننگ کن آخبت پولن سیزن آن مست مربوط حکمت عملی اس ٹہیفنگ انگ ءِ۔ اوپارے کہ وزیراعظم نا پارت آ اسلام آباد اٹی پولن الرجی نا مون ءِ توننگ کن پیشگی پبی گام گیج کننگ انگ ءِ۔ پولن الرجی نا وخت آ مون ءِ توننگ ءِ پک کننگ کن تعلقدار محکمہ غاک گچین گام گیج آتے پک کیر۔ اسلام آباد و راولپنڈی ٹی پولن نا سیزن گمانی وڑاٹ مارچ انا اول اٹی بناکیک اپریل نا ایسراسکان برجاسلک۔ اوپارےکہ سرسوز شاداب اسلام آباد نا درخت و نیال آک زیات کچ اٹی پولن خارج کیرہ۔ سی ڈی اے ءِ ڈٹ آ نظرثانی کننگ و تہونا رخ ءِ مون آ تخسا فیز۔1اٹی پین شاری علاقہ غاتے اوار کننگے۔ اوپارے کہ وزارت و تعلقدار اسٹیک ہولدڑ آتے دمدستی گام گیج کننگ و الرجی کیس آتیٹی نمان کمتی کن اسہ جوان ءُ ڈٹ اس پیش کیر۔ داڈٹ ءِ وزیراعظم نا منظوری کن پیش کننگے۔ اوپارے کہ تعلقدار اسٹیک ہولڈر آتا کمک اٹ پولن الرجی ءِ کم کننگ کن خصوصی چکار کننگ انگ ءِ۔ این آئی ایچ نا الرجی سینٹر ءِ پین سوگو کننگ انگ ءِ۔ اوشاری تیان خواست کرینے کہ او اسلام آباد ءِ الرجی آن پاک کننگ اٹ ننتون تفر۔ دیوان اٹی فیڈرل سیکرٹری ہیلتھ ندیم محبوب ڈی جی ہیلتھ ڈی جی ماحولیات ممبر انوائرمنٹ سی ڈی اے ہم ساڑی ئسر۔