اسلام آباد۔ 28 نومبر (اے پی پی) وزیراعظم محمد شہباز شریف پاکستان اسٹاک ایکسچینج نا 100 انڈیکس نا 1 لکھ پوائنٹ آن گدرینگ انگ آ مچ آقوم ءِ مبارکبادی ترسا پارینے کہ اسٹاک ایکسچینج نا تاریخ اٹی اولیکو وار اسہ لکھ پوائنٹ آن گدرینگ انگ حکومتی پالیسی تیا کاروباری برادری و زرکارآتا پت اناڈیک ءِ ایتک، بے چیٹی ٹولہ نا ہِننگ تون مثبت رجحان پدی بس، ملکی سوگوی و شونداری نا دشمن ملک ءِ دُوارہ ڈی ریل کننگ نا ناپاک و بے سہب کوشست کننگ ءُ، اوفتے سرسہب مننگ کن اِلیپنہ۔ پنچ شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم دامزل آن گدرینگ انگ آن حکومتی زرگزرانی ٹیم و ملک اٹی زرکاری نا مون آ دننگ کن اختہ مروک کمامدارآتے خراج تحسین پیش کرسا پارے کہ ای تینا قوم اتون قول کریسٹ کہ ملکی زرگزرانی سوگوی و ملکی شونداری کن ہرممکن گام ہرفیوہ۔ اوپارے کہ پاکستان ءِ ڈیفالٹ آن بچفنگ کن نن تینا سیاست نا قربانی ءِ تسن، اللہ نا فضل و کرم اٹ ننا قربانیک زیان متور۔ وزیراعظم پارے کہ ملکی سوگوی و شونداری نا دشمن ملک ءِ دُوارہ ڈی ریل کننگ ناناپاک و بے سہب کوشست کننگ ءُ۔ اوپارے کہ ملک اٹی کبینی نا کچ اٹی پین کمتی مسنے، شرح سود 15 درسد و ترسیلاتِ زر ریکارڈ کہول آ سرمسنے، وزیراعظم دا عزم انا درشانی ءِ کرے کہ ملکی شونداری کن ہنداوڑ خواری کرسا کینہ و ملکی شونداری و شونہالی نا دشمن تے تینا ناپاک مسخت آتیٹی سرسہب مننگ کن الیپنہ۔
