اسلام آباد۔27نومبر (اے پی پی): بیلاروس ءِ صدر الیگزینڈر لوکاشینکو ءَ پاکستان ءِ سئے روچی تر ءُ تاب ءِ سرجم کنگ ءَ پد وتی وطن ءَ شتگ۔ چار شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ بیلاروس ءِ صدر ءَ چہ الوداع کت۔ تر ءُ تاب ءِ ساھت ءَ بازیں مفاہمت یادداشت ءُ معاہدہ آنی سر ءَ دستخط کنگ بوت ایشی ءَ چہ دوئیں ملک آنی نیام ءَ اقتصادی سیادی آنی تہ ءَ گیشی کیت۔ بیلاروس ءِ صدر ءِ ہمراہی ءَ بیلاروس ءِ ھاسیں تاجر ءُ سرمایہ کارانی ڈل ہم پاکستان ءَ اتکگ ات کہ آہاں پاکستانی تاجراں گوں سوبمندیں ءُ پیداواری گند ءُ نند کتگ ات۔ مزن وزیر ءَ بیلاروس ءِ صدر ءِ گوما وتی سئے روچی تر ءُ تاب ءِ فوٹو البم ھم پیش کت۔ اے موہ ءِ سر ءَ نائب مزن وزیر ءُ دری کارانی وزیر اسحاق ڈار ءُ بنجاھی وزیر ءِ اھوالکاری ءُ شنگکاری عطا اللہ تارڑ ھم ساڑی ات۔
