اسلام آباد۔ 27 نومبر (اے پی پی) چیئرمین سینیٹ سید یوسف رضاگیلانی پارے کہ پاکستان و سعودی عرب نا نیام اٹ تعلقداری اسیجائی مذہبی قدر وتین پہ تینی شرف نا جوزہ غا تالان ءِ، مسلم امہ نا سیوت و پوسکن آ دور انا ویل آتیا گرینڈ مفتی مدام عالم اسلام نا راہشونی ءِ کرینے، جھیڑہ غاتا چٹفنگ، ویل آتا مون ءِ توننگ کن گرینڈ مفتی مثالی کڑد ادا کرینے، ڈیہہ اٹی امن و سوگوی نا مون آ دننگ عالم اسلام نا سرکڑدہ غاتا اسیجائی زمواری ءِ۔ سینیٹ سیکرٹریٹ نا رداٹ داخیال آتا درشانی ءِ او چارشنبے نادے آ سعودی گرینڈ مفتی شیخ عبدالعزیز بن عبداللہ الشیخ تون اوڑدہی ٹی کرے ۔ چیئرمین سینیٹ سید یوسف رضاگیلانی گرینڈ مفتی نا منت واری ءِ ہرفسا اونا عالم اسلام کن خذمت، مشکل آتیٹی اسلامی قدر انا اہمیت ءِ تالان کننگ کن کوشست آتے خراج تحسین پیش کرے۔ چیئرمین سینیٹ پارے کہ پاکستان وسعودی عرب نا تعلقداری اسیجائی مذہبی قدر و تین پہ تینی شرف نا جوزہ غاتالان ءِ۔ اومسلم امہ نا سیوت نا گرج ءِ ہم تالان کرے۔ چیئرمین سینیٹ پاکستان وسعودی عرب نا پوسکن آ دور انا چیلنج آتا اواری اٹ مقابلہ ءِ کننگ نا عزم انا درشانی ءِ کرے۔ سید یوسف رضاگیلانی پارےکہ پاکستان تعلیمی ومذہبی بشخ آتیٹی سعودی عرب تون کمکاری نا خواہندار ءِ، تعلیمی ومذہبی بشخ آتیٹی کمکاری اسلام نا کلہو ءِ لس کننگ اٹ کمکارمریک۔ اوپارےکہ ڈیہہ اٹی امن و سوگوی نا مون آ دننگ عالم اسلام نا سرکڑدہ غاتا اسیجائی زمواری ءِ، پاکستان امن و سوگوی نا گام گیج آتا کوشست آتا پبی مخ تفی ءِ کیک۔
