اسلام آباد۔ 27نومبر (اے پی پی) بنجائی وزیر حوالکاری، شینکاری ، قومی میرات و دودوربیدہ عطاء اللہ تارڑ تدوک آ نن ڈی چوک و جناح ایونیو نا خصوصی دورہ ءِ کرے و شرپسند آتا برانز آن مروک آ نسخان تا جاچ ءِ ہلک۔ بنجائی وزیر حوالکاری ڈی چوک آن سیونتھ ایونیو اسکان ہنا ہراڑے غٹ کسرآک کلیئر ئسر، پورو وڑاٹ امن ئس۔ داوخت آ بنجائی وزیر حوالکاری راستکی تیان معلومدار کرسا پارے کہ ڈی چوک آن سیونتھ ایونیو اسکان سڑک آک اسُل سنسان ءُ، بے چیٹی تالان کروک آک بے سروسامانی نا حالیت اٹ داکان نرانو، اوفتا فائنل کال انا انت مس؟ داخہ در پرغ و بٹ کرسا، بھلو ہیت کرسا موقع غان نرنگ ءِ پہہ متون۔ ڈی چوک آن بلیوایریا والا سائیڈ آ او تینا فائنل کال والا کنٹینر ءِ تینٹ خاخر تسر ہراٹی شاہدی ساڑی ئس کہ ہراہر اجاگہ غاتیا جلہو کروئی ءِ، ہراہرا سرکاری مالیت آتے نسخان تننگ و انت انت جونی نسخان کروئی ءِ، داڑے بھلو دستاویز اس ہشنگوک نظر بننگ ءِ، اوفتا پورو نیت ئس کہ مون آ سرمرسا جلاؤ گھیراؤ، جونی نسخان و سرکاری ملکیت آتے نسخان تننگ نا ءِ، اوفتا مچ آ ڈٹ مش تا مس۔ اوپارے کہ داڑے درخت آتے پرغار ، گند کریر، خل خسار ہراوڑ اوفک داڑے گندکریسر کم از کم تینا ہیت آ سلوسر، ہروار نرنگ المی مریک؟ دا اوفتا وطیرہ جوڑ مسنے، 2014ء نا دھرنا غان پد دا تینا زی آ دا اسہ ہم بھلو برانز اس کننگ کتنو، داسہ بے سروسامانی نا حالیت اٹ نرنگءُ۔ بشریٰ بی بی و گنڈاپور اسہ ایلوتون نوک جھونک نا سوب آن یکجا متورہ، سیکورٹی فورس آتا منت وار کہ اوفک دا ہڑتوم آتے یکجاکریر و اوفک اسہ ہی گاڈی ٹی تولسا نرار۔ دا ہرا ٹرانسپورٹ اٹی بسوسر اودے ہلسا نرانو، داڑے چندی ویگن آک سلوک ئسر، اوفتا بوٹ، پچ اسکان تموک ءُ۔ زیروپوائنٹ والا سائیڈ آ ہم کسر اسُل کلیئر ءِ، جلاؤ گھیراؤ نا نشان نظر بننگ ءِ، ہشنگوک ءُ موٹرسائیکل و میٹروبس نا جنگلہ پنوک خننگک داکان بیدس داڑے امن ءِ۔ بنجائی وزیرپارے کہ اونرنگ اٹ بھاز اشتافی کرینو۔ اوپارے کہ تحریک انصاف نا کنڈآن دروغ انا پروپیگنڈا کننگ انگ ءِ کہ داڑے لاش آتے بٹنگانے، ڈائریکٹ سم کاری کننگانے، دامچ آ روٹ آ ننے تو اسہ جاگہ اس ہم گولی نا خول نظر بس نئے لاش آ نظر بس و نئے اوفتے تون ویڈیوشاہدی اس ارے کہ داڑے مخلوق ءِ خلنگا۔ شرمندگی آن بچنگ کن دروغ انا پروپیگنڈا کننگ ءُ، اوفتے سما ءِ کہ دا بھاز بے وڑ بے سہب مسنو، داسہ داگڑانا سیبو ءِ ہلنگ انگ ءِ کہ سیدھا سم اٹ خلنگانے۔ اسہ ہسپتال اسے آہم ڈیڈ باڈی اس ہنتنے، کنا نوٹس اٹی داہم بسنے کہ او تینا مخلوق ءِ ٹاسک تسنو کہ چندی شارتیٹی ہراڑے قدرتی مرک آک مسنو ، اوفتا اُراغاہنسا اوفتا خاہوت ءِ پیسہ ترسا بیوس و قائل کیر کہ اوفتا مرک داڑے مسنے۔ داوڑناانت کہ واقعہ اس مرے تو غٹ آن مست پوسٹ مارٹم کرفنگک، رپورٹ اوار مریک۔ اوپارے کہ بے سہبی و نرنگ آن پد داسہ دروغ انا بیانیہ کننگ انگ ءِ ، اودے رد کینہ، دا بے سہبی آن بچنگ نا کوشست اسے۔ اوپارے کہ ہرافک ءُ ہرافتے سم اٹ خلنگانے؟ دا گڑا س مخلوق نا جعلی لسٹ سوشل میڈیا غا شیئرکننگ ءُ، داسہ اوفتا مون نا ٹارگٹ دادے کہ داسوشل میڈیا غا دروغ تالان کننگے کہ مخلوق آک کسکنو۔ بنجائی وزیر پارے کہ ننتون سی سی ٹی وی فوٹیج ساڑی ءِ ہراٹی اوفتا مخلوق سم کاری کننگ ءِ۔ اوپارے کہ دامچ آ روٹ آ پرامن وڑاٹ باندات ئس، اوفتے منتشر ضرور کننگاولے ہچ ءُ سیدھی سم کاری اس متنے نئے مرک اس مسنے، دروغ تالان کروک آتون سختی اٹ مون تننگک۔ اوموٹرسائیکل آتے ہشار۔ دا پرغ وبٹ و سرکاری ملکیت آتے نسخان تننگ کن بسوسر، داسمجھ آن پیشن ءِ کہ اوفتا مسخت انت ئس؟ کلثوم ہسپتال نا خڑک اوفک زیادہ جنگ و جھیڑہ نا کوشست کریر ، داہرا گاڈی تے ہلانوہنانو اوفتا رُخ ڈی چوک نا کنڈآ بایدے مروسس وخت اس کہ اوفتا رُخ ایلو کنڈآ نظر بننگ ءِ ولے گاڈی تتون اوار نرنگ کتور تو ہنداہی وڑ نرار۔ بنجائی وزیر پارے کہ مکافات عمل ءِ کہ او 9 مئی ءِ وردی تے لڑونج کریسر اینو اوفتا پچ آک داڑے خننگ انگ ءُ، ہرافتے اِلسا نرانو، دا لغوری نا نشانی اسے۔ اوپارے کہ تدوک آ وار ہم علی امین گنڈاپور داکان نراسس، داوار ہم ہنداکان نرانے، داامر ءُ سیاست اسے کہ نی بے چیٹی تالان کبو، پرغ و بٹ کبو و موقع غان نربو۔ اوپارے کہ دااسلام آباد اٹی لشکرکشی کننگ کن بسوسر، داوڑسیاست مفک کہ نم اِرا وار موقع غان نربو۔ اوفتے بایدے مرے کہ تینا صوبہ غاہنسا تینامخلوق نا خذمت ءِ کیر۔
