اسلام آباد۔ 26 نومبر (اے پی پی) نائب صدر پیپلزپارٹی سینیٹر شیری رحمان تحریک انصاف نا برانز اٹی شہید مروک آ رینجرز و پولیس کارندہ غاتے خراج عقیدت پیش کرساپارینے کہ واقعہ ٹی اوار زموار آتے عدالت نا مون آ اتنگے۔ سے شنبے نادے آ پی پی پی میڈیا سیل آن جاری کروک بیان نا رداٹ اوپارے کہ رینجرز، پولیس و میڈیا نمائندہ غاتیا جلہو، بیدادی و گاڈی تا پِرغنگ نا ترندی اٹ مذمت ءِ کینہ، شہید مروک آ رینجرز و پولیس کارندہ غاتے خراج عقیدت پیش کیوہ۔ شیری رحمان پارے کہ پن انا پرامن برانز نا پن آ تحریک انصاف ءِ پین اخہ در لاش درکارءِ؟ پیدواروڑاٹ تحریک انصاف بے چیٹی و برانز اٹی پرخ ءِتپک، انت تحریک انصاف نا سرکڑدہ اسہ پین 9 مئی اس خواہک؟ ۔ اوپارے کہ اسہ بندغ اسے نا یلہ کننگ کن سیاسی جماعت نا داحداسکان ہِننگ اونا ناپاک مسخت آتے پاش کیک، تحریک انصاف بے چیٹی و جتھ آتا زور آ رہائی نا روایت ءِ جوڑکپ، دا بھاز غیرکانودی و غیر آئینی ءُ روایت اسے نا بنداوءِ تخنگ انگ ءِ۔ اوپارے کہ سیاسی جماعت آک تینا مسخت آتا دوئی کننگ کن ملک انا امن و مخلوق نا زند آتے گہیو تخپسہ، تحریک انصاف نا سرکڑدہ کودک مخلوق نا زند آتون گوازی کننگ ءِ بند کے، اوپارے کہ رینجرز و پولیس کارندہ غاتا شہیدی ٹی اوار زموار آتے عدالت نا مون آاتنگے۔
