اسلام آباد۔25نومبر (اے پی پی):بیلاروس ءِ صدر الیگزینڈر لوکاشینکو سئے روچی تر ءُ تاب ءِ واستہ پاکستان ءَ سر بوتگ۔ مزن وزیر محمد شہباز شریف ءَ پی اے ایف نورخان بالی پٹ ءَ بیلاروس ءِ صدر ءِ وش اتک کت۔ اے موہ ءِ سر ءَ نائب مزن وزیر ءُ دری کارانی وزیر اسحاق دار، تہی کارانی وزیر محسن نقوی، وفاقی وزیر ءِ ھال ءُ اھوال عطا اللہ تار ءُ سرکاری مزنیں کارندہ ھم ساڑی بوتگ اَنت۔ مزن وزیر شہباز شریف ءَ بیلاروس ءِ صدر ءَ را کابینہ ءِ باسکاں گوں پجار کتگ وھدیکہ روایتی پوشاک پوشیں زھگاں آئی ءَ را گلدستہ سوگات کتگ۔ بیلاروس ءِ صدر مزن وزیر محمد شہباز شریف ءِ دعوت ءِ رد ءَ 25 ءَ بگر داں 27 نومبر 2024 ءَ پاکستان ءِ تر ءُ تاب ءَ انت۔ بیلاروس ءِ صدر ءِ پاکستان ءِ تر ءُ تاب ءِ وھد ءَ صدر لوکاشینکو ءُ مزن وزیر محمد شہباز شریف ءِ نیام ءَ گند ءُ نند بیت ءُ ڈل ءِ تک ءَ دوئیں ملکانی نیام ءَ گپ ءُ تران ھم بیت۔ دومی نیمگ ءَ بیلاروس ءُ پاکستان ءِ نیام ءَ جتاجتائیں شعبہ آنی تہ ءَ کمک ءِ تہ ءَ گیشی ءِ واستہ مفاہمت نامہ آنی سر ءَ دستخط کنگ بیت ۔ بیلاروس ءِ دری کارانی وزیر ءِ سروکی ءَ 68باسکی مزن تک ءِ ڈل گوستگیں روچ ءَ پاکستان ءَ سر بوتگ۔ ڈل ءِ تہ ءَ بیلاروس ءِ کابینہ ءِ ھاسیں وزیر، نامداریں تاجر ءُ سرمایہ کار ھوار اَنت۔ بیلاروس ءِ صدر ءِ پاکستان ءِ تر ءُ تاب دوئیں ملک آنی نیام ءَ مھکم ءُ دیمروئی کنوکیں شریکداری ءِ درشان انت۔
