اسلام آباد۔ 28 اکتوبر (اے پی پی) بنجائی وزیر کانود، انصاف و پارلیمانی امور سینیٹر اعظم نذیرتارڑ پارینے کہ کانود نا حکمرانی، انسانی حق انا رکھ و انسانیت نا برخلاف ڈوہ انا توننگ کن اواری اٹ کاریم کننگ نا گرج ءِ، پاکستان امن و انصاف نا ہدف آتا دوئی کننگ کن دنیا تون اواری اٹ کاریم کننگ کن سنبرینگوک ءِ، پاکستان جمہوریت، جمہوری قدر و انسانی حق انا رکھ انا بابت ہم تینا زمواری تے پورو کننگ ءِ۔ اوپارلیمنٹرین فار گلوبل ایکشن (پی اے جی) نا 47 می سالانہ فورم و پارلیمنٹرین نا سلابتی اسمبلی نا دیوان نا وخت آ روم کانود نا نفاذ نا علاقائی رداٹ، ہندی کانود آتیٹی اصلاحات نا سرحال آن شرہ غان ت ران کریکہ۔ وزیرکانود و انصاف سینیٹر اعظم نذیر تارڑ پارے کہ پاکستان امن، سوگوی وانسانی حق انا شرف نا بابت سنبرینگوک ءِ، پاکستان مدام امن، سوگوی و انسانی آجوئی تا مون آ دننگ و رکھ اکن کاریم کرینے۔ اوپارے کہ انسانی حق انا رکھ و جمہوریت نا مون آ دننگ اٹ پارلیمان و پارلیمان نا باسک آک اہم نوعیت نا حامل ءُ پاکستان سلہہ غاتا چٹفنگ و بھلو کچ اسے آ بھسکاری تالان کروک سلہہ غاتا تالانی نا مون ءِ توننگ اٹ تینا کڑد ادا کرینے ، داڑتون اوار اوار نن جمہوریت، جمہوری قدر و انسانی حق انا رکھ انا بابت ہم تینا زمواری تے پورو کننگ ءِ۔ وزیرکانود و انصاف پارینے کہ جمہوریت ، موسمیاتی بدلی و موسمیاتی موزونیت داوخت اہم امور آتیان اسٹ ءُ، ننا پورو یقین ءِ کہ عالمگیر سوچ اتون نن دا ویل آتے اواری اٹ ایسر کننگ کینہ۔ دا چرجوئی ٹی ہندی قوم و کانود آتے جہانی کانود و قدر اتون منسلک کننگ، سیاسی طرز عمل اٹ بدلی، اقتصادی اولیت و کانودی روایت ہموبشخ آک ءُ ہراڑے اواری اٹ کاریم کننگ نا گرج ءِ۔ وزیرکانود و انصاف سینیٹر اعظم نذیر تارڑ پارے کہ روم کانود نا رداٹ گڑاس ملک آک اہم اصلاحات کرینو وخت اس کہ اوڑآن چپ ایلو ملک آک گام گیج آتا کچ کم ءِ۔ اوپارے کہ پاکستان مدام امن، سوگوی، انسانی حق انا رکھ و انسانی آجوئی نا پرچارکرینے، دنیا نا چندی ڈیہہ تیٹی امن نا آپریشن تیٹی پاکستان تینا اہم کڑد ءِ ادا کرینے۔ وزیرکانود پارے کہ دا ہیت افسوزناک ءِ کہ دنیا جھیڑہ غاتا پورو ایسری ٹی سرسہب مننگ کتنے، پاکستان انسانی حق انا رکھ و موسمیات موزونیت نا بابت اہم گام گیج کننگ ءِ۔ پاکستان راج انا نزور تپہ غاتا فائدہ غاتا رکھ انا کانود درستی راستی کرفینے، پاکستان جہانی کہول آ انصاف و بریبری نا مخ تف ءِ۔ بی جی اے نا بورڈ باسک و کینیا ناپارلیمان نا باسک ملی اوڈی امبومابونا پارینے کہ انسانیت نا برخلاف ڈوہ اسہ قوم یا ڈیہہ اسے نا برخلاف اف، بلکن مچ آ انسانیت نا برخلاف ءِ، دارداٹ جہانی فوجداری عدالت نا کڑد اہمیت تخک۔ آئی سی سی ءِ ممبر ملک آتیٹی مروک آ انسانیت نا برخلاف ڈوہ تیا جاست وپاست و سزا بِنفنگ نا اختیار دوئی ءِ۔ اگہ ملک اس فیصلہ غاتیا عمل کپ تو آئی سی سی ہموڑے ہم بایدے تینا کڑد ءِ ادا کے، ہینڈوراس اٹی ہم آئی سی سی جاست وپاست کریسس ولے اودے ہموڑے انسانی حق انا خلاف ورزی نا ہچ ءُ شاہدی اس ملیتو۔ یوگنڈا نا پارلیمنٹ اٹی انسانی حق کمیٹی نا چیئرپرسن و پی جی اے ممبر فاکس اودہی اوہیو یلو جہانی فوجداری عدالت نا فیصلہ، اوفتیا عملدرآمد و ملک آتا کڑد ءِ مون آتخا۔ ارجنٹائن نا سیاسی جماعت جنریشن فاردی نیشنل انکاؤنٹرو پی جی اے نا مسکوہی صدر مارگریٹا سٹالبیزرپارے کہ پی جی اے نا پلیٹ فارم آن نن بھاز کاریم کرینن، انسانیت نا رکھ ملک آتا زمواری مریک اونا خلاف ورزی ءِ کننگ نا کس اسے مومکل مفک۔ اوپارے کہ غٹ آن اہم زمواری دا مریک کہ قدر آتیا عملدرآمد ءِ پک کننگے۔ قدر انا برخلاف مروک آ ڈوہ انا توننگ کن ملک آتا کہول آ کانود سازی و عملدرآمد ءِ گچین کننگ نا گرج ءِ۔
