لاہور۔27اکتوبر (اے پی پی):پاکستان پیپلز پارٹی ءِ چیئرمین بلاول بھٹو زرداری ءِ سروکی ءَ ڈل ءَ مزن وزیر محمد شہباز شریف ءَ گوں لاہور ءَ گند ءُ نند کت۔ مزن وزیر کارگس ءِ پریس ونگ ءِ رد ءَ پاکستان پیپلز پارٹی ءِ ڈل ءَ پیسریگیں مزن وزیر راجا پرویز اشرف، گورنر پنجاب سردار سلیم حیدر، راجی اسمبلی ءِ باسک سید نوید قمر ءُ میئر کراچی مرتسی وہاب ءَ بہر زرتگ۔ گند ءُ نند ءَ پاکستان مسلم لیگ (ن) ءِ نیمگ ءَ کانود ءِ بنجاھی وزیر نذیر تارڑ، مزنیں رہشون رانا ثنا اللہ ھم ساڑی ات۔ گند ءُ نند ءَ ملک ءِ سیاسی جاورانی بابت ءَ سرجمیں رنگ ءَ گپ ءُ تران بوت۔ مزن وزیر محمد شہباز شریف ءَ گوشت کہ پاکستان پیپلز پارٹی حکومت ءِ مستریں اتحادی پارٹی انت، ملکی معیشت ءِ برجائی ءِ واستہ پاکستان پیپلز پارٹی ءَ ہر گامگیج ءَ حکومت ءِ کمک کتگ۔ گند ءُ نند ءِ واستہ اتکگیں پاکستان پیپلز پارٹی ءِ ڈل ءَ ملکی معیشت ءِ برجائی ءِ واستہ حکومت ءِ معاشی پالیشیانی توسیپ کتگ ۔ پاکستان پیپلز پارٹی ءِ ڈل ءَ حکومت ءِ پابندی ءُ گامگیج آنی سر ءَ سرجمی ءَ دل یکیمی ءِ درشان کت ایشی ءَ را مزن وزیر ءَ وش اتک کت۔
