بیست ءُ شش می آئینی ترمیم نا منظوری پاکستان نا زرگزرانی و سیاسی سوگوی و الس ناراجی آسودہی کن مزل نانشان نا حیثیت تخک، لس بندغ ءِ انصاف نا دوئی کننگ اٹ آسانی مریک، وزیراعظم شہباز شریف

اسلام آباد۔ 22 اکتوبر (اے پی پی) وزیراعظم محمد شہباز شریف پارینے کہ 26 می آئینی ترمیم نا بل انا پارلیمنٹ آن اِرا تہائی  گیشتری اٹ منظوری پاکستان نا زرگزرانی و سیاسی سوگوی و الس نا راجی آسودہی کن مزل نا نشان نا حیثیت تخک، داڑآن لس بندغ ءِ انصاف نادوئی کننگ اٹ آسانی ودی مریک۔ اوداہیت ءِ سے شنبے نادے آ بنجائی کابینہ نا دیوان آن تران کرسا پارے۔ وزیراعظم پارےکہ لس بندغ نا کانودی باندات  آک سال آتیان پدتموک ئسر ، ہرا بندغ وسیلہ غاتا حامل اف و رسینگ کپک اودے انصاف ملیپک۔ داویل آتا ایسری کن دا آئینی ترمیم مثبت کڑد ادا کیک۔ اوپارے کہ لس بندغ ءِ انشاءاللہ انصاف نا دوئی کننگ اٹ آسانی دوئی مریک۔ اوفتا باندات آتا زوت طے مننگ نا سوگو اومیت ءِ۔ وزیراعظم پارے کہ 2006ء ٹی لندن اٹی میثاق جمہوریت آ شہید گودی بینظیر بھٹو ومیاں محمد نواز شریف نا نیام اٹ ہرادستخط مسوسس داہمو وژن نا ہم پوروی ءِ۔ داترمیم داوژن نا سچائی نا شاہدی ہم ارے۔ ترمیم نا بابت غٹ سیاسی سرکڑدہ غاتون سلابت کننگا۔ پارلیمان نا نمائندہ سیاسی سرکڑدہ غاتون سرجمی اٹ سلابت مس۔ داٹی حزب اختلاف آن تعلق تخوک آ وسیوتی سیاسی جماعت آک ہم اوار ئسر۔ اوپارے کہ 26 می آئینی ترمیم اللہ تعالیٰ نا فضل وکرم اٹ پاکستان نا شونداری و شونہالی و سوگوی کن گچین و مثبت پک مریک۔ وزیراعظم صدر مملکت آصف علی زرداری ، پی پی پی نا چیئرمین بلاول بھٹو زرداری، مسلم لیگ ن نا قائد میاں محمد نواز شریف تون اوار غٹ سرکڑدہ غاتا است انا حب اٹ منت واری ءِ ہرفے ہرادابابت کمک وپبی راہشونی کرے۔ وزیراعظم پارےکہ جمعیت علمائے اسلام (ف) ناسروک مولانا فضل الرحمان تون ننا چندی نشست مس، کنا رفقاء کار، نائب وزیراعظم محمد اسحاق ڈار، وزیرکانود اعظم نذیر تارڑ ، رانا ثناء اللہ خان تون اوار ایلو سرکڑدہ غا ک ہم ملک انا سیاسی سرکڑدہ غاتون سلابت اٹی اوار ئسر۔ اوپارے کہ حکومت نا سیوتی جماعت، ایم کیوایم نا سرکڑدہ، نیشنل پارٹی، اے این پی، بلوچستان عوامی پارٹی نا راہشون آتون اوار غٹ سرکڑدہ غاتون اسٹ اسٹ آ و اجتماعی وڑاٹ جوان سلابت کرے۔ اوپارے کہ آئینی ترمیم اٹی کمک کروک آ غٹ سرکڑدہ غاتا است انا حب اٹ منت واری ءِ ہم ہرفے۔ وزیراعظم پارلیمان نا آزاد باسک آتاہم منت واریءِ ہرفے ہرافتا کمک اٹ سینیٹ اٹی ترمیمی بل 65 وونٹ آتا گیشتری اٹ منظور مس وخت اس کہ قومی اسمبلی ٹی دا 225 وونٹ آتے اٹ منظور کننگا۔ 26 می آئینی ترمیم نا اہم پیش رفت ایسر آ سرمس۔ وزیراعظم محمد شہباز شریف شنگھائی کمکار تنظیم (ایس سی او) نا سروکی دیوان نا سرسہب اڈتننگ آ کابینہ ءِ مبارکبادی تس و منت واری ءِہرفے۔ اوپارے کہ ایس سی او کانفرنس پاکستان نا بابت بھازسرسہب پک مس، مچ آ دنیا ٹی پاکستان ناتشخص اٹی ودکی مس۔ اللہ تعالیٰ پاکستان ءِ عزت عطاکرے۔ کانفرنس نا سرسہبی کن بے پناہ کوشست کننگا۔ کانفرنس نا اڈتننگ نا بابت چندی چیلنج ئسر ہرافتیان غٹ آن بھلا چیلنج سیکورٹی نا ئس۔ وزارت خارجہ وزارت حوالکاری و اونا ٹیم و وزیرحوالکاری عطاءا للہ تارڑ دے و نن خواری کرے۔ اووزیرداخلہ محسن نقوی و سیکرٹری داخلہ  تون اوار کانود نافذ کروک آ غٹ ادارہ ، پولیس ، رینجر و انٹیلی جنس ایجنسی تتون اوار اوار پاک فوج انا کنڈآن سیکورٹی نا بابت پبی کمکاری آ منت واری ءِ ہرفے۔ اوپارےکہ 11سال آن پد چینی وزیراعظم پاکستان آبس۔ داکان مست 2013ٹی آنجہانی چینی وزیراعظم پاکستان آ بسوسس و داسہ یانزدہ سال آن پد چین نا ساڑی آ وزیراعظم لی چیانگ پاکستان نا دورہ ءِ کرے۔ اومستی پارے کہ چینی وزیراعظم نا دورہ  بھاز سرسہب مسنے۔ ای سرپند مریوہ کہ دادورہ پاکستان و چین نا سنگتی ءِ پین سوگو کننگ اٹ اہم کڑد ادا کیک۔ ہندا وڑ ایلو ملک آتا سرکڑدہ غاک ہم کانفرنس اٹی بشخ ہلکر و داوخت آ جوان سلابت آن پد اعلامیہ جاری مس۔ ایس سی او دیوان اٹی بشخ ہلوک آ مہمانک بنجائی دارالحکومت اٹی زیبائی و بیرفنگ نا ستاءِ کریر۔ دابابت سی ڈی اے نا چیئرمین محمد علی رندھاوا و اونا ٹیم انا خواری نا معترف اُٹ۔ اوبنجائی وزیر اقتصادی امور احد چیمہ، سیکرٹری اسد گیلانی، وزیراعظم آفس نا ایلو کمامدار وٹیم انا ہم منت واری ءِ ہرفے۔ وزیراعظم دااومیت نا درشانی ءِ کرے کہ پاکستان نا زرگزرانی شونداری ٹی سوگوی بننگ ءِ و ننا اجتماعی کوشست آتے اٹ پاکستان ترندی اٹ شون ہلیک۔ وزیراعظم محمد شہباز شریف پارےکہ کبینی نا کچ 6.9 درسد اسکان کم مسنے، ہرا اللہ تعالیٰ نا خاص کرم ءِ۔ ہندا وڑ پالیسی ریٹ اٹی خاطرخواہ کمتی مسنے و پین کمتی گمانی ءِ۔ فلسطین و لبنان نا بابت گپ وتران کرسا اوپارے کہ غزہ و فلسطین اٹ ظلم و ستم برجاءِ ۔ چناو زالبول آتے شہید کننگ انگ ءِ۔ اسرائیلی ظلم دے ونن برجاءِ ہرافتے ٹی ہچ ءُ کمتی اس بفننگ ءِ، اقوام متحدہ نا سلامتی کونسل نا قرارداد آتیا داسکان ہچ ءُ عملدرآمد اس متنے، ہندا وڑ ہیگ انا جہانی عدالت نا فیصلہ ءِ ردی نا ٹوکری اٹ خسنگانے۔ وزیراعظم محمد شہباز شریف پارے کہ سرپند مریوہ کہ تاریخ اٹ داکان مست داوڑنا است ہسون واقعہ خننگا نئے خف توننگا۔ اوپارےکہ نن غٹ اللہ تعالیٰ نا حضور دعا کننگ اُن کہ ہموڑے زوت آن زوت جنگ بندی مرے۔ بے گناہ مسلمان تا کشت وخو ن بند مرے، دے و نن دتر نا ہولی ٹی گوازی کننگ چٹے۔ پاکستان غزہ و لبنان نا ایلم و ایڑھ تیکن مہالو آن کمکی  کمکاری نا گام گیج آتا بناءِ کرینے ہرا مچ آ قوم انا مون آٹے۔ پین جوان پروگرام نا رداٹ غزہ و لبنان نا ایلم تے پین کمکی گڑا سرکینہ۔ دابابت بھاز مشکلات ءِ و کسراٹ چندی اڑاند آک ءُ۔ اوپارے کہ نائب وزیراعظم ، دفترخارجہ تون اوار این ڈی ایم اے نن غٹ اواری اٹ پورو کوشست کننگ اُن۔ وزیراعظم مچ آملک انا الس و صاحب ثروت بندغ آتیا زور شاغا کہ اینو وخت ءِ کہ نم تینا ایڑھ وایلم تیکن مون آببو و وزیراعظم ریلیف فنڈ اٹی عطیہ جمع کرفبو، داڑآن دین ودنیا نا آسودہی دوئی مریک۔