وزیراعظم شہباز شریف نا لبنان و غزہ کن کمکی گڑاتا فراوانی ءِ ترند کننگ ناپارت

اسلام آباد۔ 22 اکتوبر (اے پی پی) وزیراعظم محمدشہباز شریف لبنان و غزہ کن کمکی گڑاتا اِرا جہاز دمدستی وڑاٹ گدریفنگ، کمکی گڑاتا فراوانی نا رفتار ءِ ترند و وزیراعظمریلیف فنڈ غز ہ ولبنان نا بابت پبی آگہی مہم اس چلیفنگ نا پارت کرینے۔ وزیراعظم آفس نامیڈیا ونگ آن جاری بیان نا رداٹ وزیراعظم نا کماشی ٹی غزہ ، فلسطین و لبنان اٹی پاکستان نا کنڈآن مون تروک آ امداد نا بابت جاچ دیوان اس اڈہلک۔ دیوان اٹی بنجائی وزیر ڈٹ بندی احسن اقبال، بنجائی وزیر اقتصادی امور احدخان چیمہ، بنجائی وزیر حوالکاری و شینکاری عطاء اللہ تارڑ، وزیر مملکت انفارمیشن ٹیکنالوجی و ٹیلی کام شزا فاطمہ ،خصوصی کمکار طارق فاطمی، چیئرمین ہائر ایجوکیشن کمیشن، چیئرمین این ڈی ایم اے و تعلقدار بڑزکو کمامدارآک بشخ ہلکر۔داوخت آ وزیراعظم لبنان و غزہ ک کمکی گڑاتا اِرا ہوائی جہاز دمدستی وڑاٹ گدریفنگ نا پارت کرساپارینے کہ ہوائی کسر آن بیدس ڈغار کسر اٹ ہم ٹرک آتا کمک اٹ کمکی گڑا لبنان و غزہ کن روانہ کننگے۔ وزیراعظم کمکی گڑاتا فراوانی نا بابت فلسطین لبنان ، اردن ومصراٹی تعینات پاکستانی سفیر آتون رابطہ غاتے پین گچین کننگ نا ہم پارت کرے۔ وزیراعظم پارے کہ داہیت ءِ پک کننگے کہ امداد حقدار اسکان رسینگے۔ اوکمکی گڑاتا فراوانی نا رفتار ءِ ترند کننگ نا پارت کرے و الس آن اسہ وار ولدا اپیل کرے کہ پاکستانی الس خاص وڑاٹ صاحب ثروت بندغ آک زیات آن زیات وزیراعظم ریلیف فنڈ غزہ و لبنان اٹی عطیہ جمع کرفر۔ وزیراعظم پارے کہ پاکستان وملک آن پیشن رہینگوک پاکستانی آئی بی اے این نمبرIBAN:PK11SBPD000000111111429 اٹی عطیہ غاتے جمع کرفسا تینا فلسطینی و لبنانی ایڑھ ایم تا کمک اٹ حکومت تون تفر۔ اووزیراعظم ریلیف فنڈ غزہ و لبنان نا بابت پبی آگہی مہم اس چلیفنگ نا پارت ہم کرے۔ داوخت آ دیوان ءِ لبنان و غزہ ٹی پاکستان نا کنڈآن کمکی کارروائی تیا حوال تننگا۔ حوال اٹی پاننگاکہ پاکستان ناکنڈآن غزہ و لبنان اٹی اسرائیلی جارحیت آن زہمی ایڑھ و ایلم تیکن یخ آن بچفوک آ تمبو، پچ ، کمبل ، دوائی، کنوئی آ گڑا گدریفنگ انگ ءِ۔ اسرائیلی جلہو و گھیڑی تا سوب آن فلسطین و لبنان نا زہمی علاقہ غاتیٹی کمکی گڑاتا فراوانی ٹی دشواری نا مون تروک ءِ۔ ہرااین جی او غزہ و لبنان نا زہمی تیکن زر و کمکی گڑاگدریفنگ خوارہ اوفتے کمکی گڑاتا فراوانی نا بابت حکومت پاکستان نا کنڈآن آسراتی فراوان کننگک۔