اسلام آباد (اے پی پی) صدر آصف علی زرداری ءَ شمالی عرب بحر ءَ منشیات ءِ ھلاپ ءَ مزنیں ءُ سوبمندیں آپریشن ءِ برجم دارگ ءِ پد ءَ پاک بحریہ ءَ را شگر ءُ منت گپت۔ جمعہ ءِ روچ ءَ صدر ءِ مملکت گس ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ پاک بحریہ ءِ توسیپ کتگ کہ آئی ءَ شکی ئیں لانچ ءَ چہ مزنیں کساسے ءَ منشیات دستگیر کتگ ءُ گوشت کہ راجی دژمن ءُ دست مانجنیں ناشرکار آنی ھلاپ ءَ پاک بحریہ ءِ جوانیں کارروائی ستا کرزیں گپے ۔ آئی ءَ گوشت کہ شمالی عرب بحر ءَ یکجاھیں ٹاسک فورس 150 ءِ گوما سوبمندیں آپریشن پاک بحریہ ءِ پیشہ وارانہ رنگ ءَ آدینک انت۔پاک بحریہ ءِ جہاز پی این ایس ذوالفقار ءُ پاکستان میری ٹائم سیکورٹی ایجنسی ءِ جہاز پی ایم ایس ایس کولاچی ءَ یکجائی آپریشن ءَ بہر زرتگ۔ یکجائی آپریشن ءِ تہا امریکی بحریہ ءِ بالی گراب یو ایس ایس ابراہیم لنکن، امریکی کوسٹ گارڈ ءُ پاک بحریہ ءِ بالی گراباں ہم کمک کتگ۔ صدر ءِ مملکت ءَ پاکستان ءِ دریائی سیمسر آنی رکھینگ ءُ دریا ءَ ناجائزیں چست ءُ ایر آنی ھلاپ ءَ پاک بحریہ ءِ کرد ءَ را ساڑات۔
