پاکستان ایس سی او نا باسک ملک و ڈیہہ انا گیشتر فائدہ غاتیکن است انا حب اٹ کاریم کرسا کیک، وزیراعظم محمد شہباز شریف

اسلام آباد۔ 17 اکتوبر (اے پی پی) وزیراعظم محمد شہباز شریف پارینے کہ شنگھائی کمکار تنظیم نا باسک ملک انا حیثیت اٹ پاکستان تنظیم نا ایلو باسک ملک و ڈیہہ انا گیشتر فائدہ غاتا رداٹ تنظیم نا شونداری اولیت آتا مون آ دننگ کن است انا حب اٹ کاریم کرساکیک۔ پنچ شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف تون شنگھائی کمکار تنظیم نا سیکرٹری جنرل ژانگ منگ وزیراعظم ہاؤس اسلام آباد اٹی اوڑدہی کرے۔ ژانگ منگ شنگھائی کمکار تنظیم نا سروک حکومت (سی ایچ جی) نا دیوان اٹی بشخ ہلنگ کن اسلام آباد آ بسوسس۔ سیکرٹری جنرل شنگھائی کمکار تنظیم نا جولائی 2022نا دورہ ءِ پاکستان نا ذکر ءِ کرسا وزیراعظم اسلام آباد اٹی سیکرٹری جنرل ءِ بخیرکرے و شنگھائی کمکار تنظیم کونسل آف ہیڈز آف گورنمنٹ دیوان نا اڈتننگ اٹ شنگھائی کمکار تنظیم سیکرٹریٹ نا کنڈآن پاکستان ءِ تروک آ کمکاری آ اونا منت واری ءِ ہرفے۔ شنگھائی کمکار تنظیم نا چارٹرنا تئیں پاکستان نا عزم انا درشانی ءِ کرسا وزیراعظم سیکرٹری جنرل ءِ باوری کرفے کہ شنگھائی کمکار تنظیم نا باسک انا حیثیت اٹ پاکستان باسک ملک و ڈیہہ انا گیشتر فائدہ غاتیکن تنظیم نا شونداری اولیت آتا مون آدننگ کن است انا حب اٹ کاریم کرساکیک۔ اومستی پارے کہ پاکستان ایس سی او و باسک ملک آتون تنظیم ءِ پین گچین و سوگو کننگ کن کاریم کرساکیک۔ وزیراعظم ایس سی او نا دزکش مروک آ سیکرٹری جنرل نا حیثیت اٹ ژانگ منگ نا لگن و شاندار خذمت آتیا ہم منت واری ءِ ہرفے و اونا آخبت کن نیک است خواہی نا درشانی ءِ کرے۔ ژانگ منگ وزیراعظم ءِ شنگھائی کمکار تنظیم کونسل آف ہیڈز آف گورنمنٹ دیوان نا سرسہب اڈتننگ و اونا مثبت نتیجہ غاتیا مبارکبادی تس۔ اوایس سی او نا غٹ بشخ آتیٹی پاکستان نا تعمیری شریداری نا ستاءِ کرے و ایس سی او کونسل آف ہیڈز آف گورنمنٹ چیئرناوڑات پاکستان نا قائدانہ کڑدآ است جمی نا درشانی ءِ کرے۔