پاکستان و منگولیا تین پہ تینی وڑاٹ فائدہ ئی کمکاری نا بایدے پوسکن ءُ کسر پٹر، وزیراعظم شہباز شریف نا منگولیا نا ہم منصب تون اوڑدہی ٹی گپ وتران

اسلام آباد۔ 17 اکتوبر (اے پی پی) وزیراعظم محمد شہباز شریف پارینے کہ پاکستان و منگولیا واپار، زرکاری، الس تون السی و مواصلاتی رابطہ غاتیا خصوصی چکار اتون تین پہ تینی وڑاٹ فائدہ ئی کمکاری نا بایدے پوسکن ءُ کسر پٹر۔ وزیراعظم آفس میڈیا ونگ آ ن جاری اعلامیہ نا رداٹ وزیراعظم تون شنگھائی کمکار تنظیم (ایس سی او) نا سروک حکومت نا دیوان اٹی بشخ ہلنگ کن بروک  منگولیا نا وزیراعظم اویون اردین لویسنائی پنچ شنبے نادے  آ داڑے اوڑدہی کرینے۔ وزیراعظم محمد شہباز شریف منگولیا نا وزیراعظم ءِ جم وجوش اٹ بخیر کرے و پارے کہ اونا دورہ ہڑتوم آ ملک آتا نیام اٹ تین پہ تینی شرف، خیرخواہی و برادرانہ تعلقداری نا تاریخ اٹ اسہ پوسکن ءُ بشخ اسے نا بناءِ۔ اومنگولیا نادُوارہ وزیراعظم گچین مننگ آ اودے مبارکبادی تس و ہڑتوم آملک آتا نیام اٹ تین پہ تینی کمکاری ءِ پین سوگو کننگ کن اواری اٹ کاریم کننگ نا است خواہی نا درشانی ءِ کرے۔ وزیراعظم سلاہ پیش کرے کہ ہڑتوم آملک آتے واپار، زرکاری، السی و مواصلاتی رابطہ غاتیا خاص چکاراتون تین پہ تینی وڑاٹ فائدہ ئی کمکاری نا بایدے پوسکن ءُ کسر پٹر۔

وزیراعظم محمد شہباز شریف منگولیا نا سول سرونٹس ءِ پاکستان نا ہیلکاری ادارہ غاتیٹی تربیت نا پیش کش کرے و ہڑتوم آ ملک آتا نیام اٹ برادرانہ تعلقداری ءِ پین مون آ دننگ کن 2025 ءِ پاکستان۔ منگولیا سنگتی ناسال گوندنگ نا سلاہ ہم پیش کرے۔ منگولیا ناوزیراعظم شنگھائی کمکار تنظیم ناسروک حکومت نا دیوان نا سرسہب اڈتننگ آ وزیراعظم محمد شہبازشریف ءِ مبارکبادی پیش کرے و ایس سی او سی ایچ جی چیئرنا وڑاٹ پاکستان نا قائدانہ کڑد انا ستاءِ کرے۔ اوہڑتوم آملک آتا نیام اٹ اسیجائی کوشست و کمکاری نا کمک اٹ سوگو و خڑکی ہڑتوم آ کنڈآتا تعلقداری استوار کننگ نا است خواہی نا درشانی ءِ ہم کرے۔ ہڑتوم آ راہشونک واپار، سیل و سوات، کشت وکشار وکانڑکنی نا بشخ آتیٹی کمکاری ءِ ودفنگ کن اسیجائی وزارتی کمیشن اس جوڑ کننگ آ امنا کریر۔ اوڑدہی ٹی ہڑتوم آملک آتا نیام اٹ پارلیمانی تعلقداری تے ودفنگ کن بین الپارلیمانی یونین نا جوڑ کننگ آہم امنا کننگا۔ اوڑدہی نا وخت آ منگولیا ناوزیراعظم اویون اردین لویسنائی وزیراعظم ہاؤس اٹی نیال اس ہم خلک۔