مسلم لیگ (ن) نا سینئر راہشون چوہدری جعفر اقبال و سینئر صحافی رانا عمران لطیف نا اوڑدہی، سیاسی حالیت و صحافی تے مون تروک ویل آتا بارواٹی گپ وتران

رحیم یار خان۔ 17 اکتوبر (اے پی پی) پاکستان مسلم لیگ (ن) نا سینئر مرکزی راہشون و مسکوہی ڈپٹی اسپیکر قومی اسمبلی چوہدری محمد جعفر اقبال پارینے کہ پاکستان نا آخبت روشنا و تابناک ءِ۔ بدخواہ تا سازش آک اسُل سرسہب مفسہ، ساڑی آ ملکی حالیت آتیٹی صحافی تاکڑد بھاز اہم ءِ۔ اوداہیت ءِ اسلام آباد نا سینئر صحافی و اینکر پرسن رانا عمران لطیف نا کماشی ٹی صحافی تا ڈل اتون گپ وتران کرسا پارے ہرا صدر ڈسٹرکٹ پریس کلب رحیم یارخان قیصر غفور چوہدری تون اوار اوڑتون اوڑدہی کریر۔ اوڑدہی ٹی ملک انا ساڑی سیاسی حالیت و صحافی تے مون تروک ویل آتا بارواٹی سرجمی اٹ گپ وتران کننگا۔ پنچ شنبے نادے آ جاری پریس ریلیز نا رداٹ داوخت آ گپ وتران کرسا چوہدری محمد جعفراقبال پارے کہ پاکستان ڈیہہ انا اہم ملک و اسلامی دنیا نا غٹ آں بھلا عسکری واک ءِ، ہرانا دفاع ناقابل تسخیر و آخبت روشناوتابناک ءِ۔ پاکستان نا بدخواہ تاسازش آک اسُل سرسہب مفسہ، پاکستان اٹ رہینگوک آ ہربندغ جانثاری نا جوزہ غان سرشار ءِ و ضرورت تمنگ آ ملک انا دفاع کن ہروڑنا قربانی ایترہ۔ اوپارے کہ ساڑی ملکی حالیت آتیٹی صحافی تا کڑد بھاز اہم ءِ انتئے کہ صحافی راج انا خن و خف مریک و نن اوفتا کڑد انا ستاءِ کینہ۔ اوپارے کہ مسلم لیگ (ن) نا کماشی السی خذمت اٹی ثانی تخپک ، مستین گواہ ءِ کہ جماعت ملک ءِ مدام شونداری تس و الس نا زند انا آب ءِ بڑزکرے، ساڑی حکومت ہم ہندا چرجوئی ءِ مون آ دننگ ءِ۔ چوہدری جعفر اقبال پارے کہ بے چیٹ حالیت آتیان پد ہم بنجائی و صوبائی حکومت الس ءِ ریلیف نا فراوانی ءِ ہرحال اٹ پک کرے و غٹ دوئی وسیلہ غاتے السی راجی آسودہی آ خڑچ کننگ انگ ءِ ہراڑآ وزیراعظم محمد شہبا زشریف و وزیراعلیٰ پنجاب مریم نواز خراج تحسین نا حقدار ءُ ہرافک پارٹی صدر محمد نواز شریف نا ویژن نا پوروی نا پکا تہیہ کرینو۔ رانا عمران لطیف پارے کہ ملک انا غٹ آن بھلا ویل بے گرج سیاسی نوک جھونک ءِ ہرادے سیاست دان تے اواری اٹ تولسا چٹفوئی مریک، داوخت تین پہ تینی اختلاف آتے تہو تننگ نا آخا بلکن یکجا مرسا ملکی سوگوی و شونداری کن کڑد ادا کننگ نا ءِ۔ اوپارے کہ پاکستان ءِ اللہ تعالیٰ بے شمار نعمت تسنے، ننے خودانحصاری اختیار کرسا تینا وسیلہ غاتے کاریمی جوڑ کروئی مریک۔ اوپارے کہ صحافت ءِ جمہوریت نا چارمیکو تمبہ پاننگک ہرا راج انا ویل آتے تالان کننگ و الس نا توار ءِ حکمران تسکان سرکننگ اٹ اہم کڑد اداکیک۔ حکومت ءِ مرے کہ صحافی تا ویل آتے ایسر کے۔ صدر ڈسٹرکٹ پریس کلب قیصر غفور چوہدری پارے کہ سیاسی فائدہ غاتا خاطر ملکی فائدہ غاتے گہیو تخوک آتے ہوش کروئی مریک۔ مون تروک حالیت آتیٹی غٹ سیاسی و مذہبی سرکڑدہ غاک ملکی فائدہ غاتا پوروی آ چکار تخر ملک انا الس ہم محب وطن و چانثارءُ۔ داخت آ توقیر خان ایڈوکیٹ ، چوہدری زاہد گجرو ایلوفک ساڑی ئسر۔