ایس سی او سروک دیوان نا وخت آ بنجائی دارالحکومت روشنائی تا شار اٹی بدل

اسلام آباد۔ 16 اکتوبر (اے پی پی) کیپٹل ڈویلپمنٹ اتھارٹی (سی ڈی اے) شنگھائی کمکار تنظیم (ایس سی او) نا سروکی دیوان نا وخت آ بنجائی دارالحکومت ءِ دلکش و دیدہ زیب بیرفنگ تون اوار اوار بجلی نا بتی تے اٹ روشنا کننگا ہراشار انا قدرتی زیبائی ءِ دوبالاکریر۔ سی ڈی اے شار انا اہم ہند و کسر و چورنگی تے تھری ڈی لائٹ آتے اٹ مزین کرے۔ شاہراہ دستور، سرینا چوک و راول ڈیم چوک کون آ اہم علاقہ غاتیٹی ماڑی و یات گار آتے جتا پھل آتے اٹ بیرفنگا ہرا پاکستان نا شاندار دودوربیدہ ئی میرات و ایس سی او نا باسک ملک آتا سیوت نا پبی عکاسی ءِ کننگ ءِ۔ دلکش سجاوٹ اٹ ہندا ہندآک اسہ جوان ءُ منظراس پیش کننگ اٹی ءُ۔ دلکش ندارہ غاتے ہروک آ شاریک ہندا روشنائی وپھل آتا ڈیزین آن مسحور مرساکریر ہرا پوسکن آ ٹیکنالوجی و روایتی جمالیات نا حسین امتزاج خننگا، سڑک و پول آتیان ہلیس ماڑی تیا بھلو کچ اسے آ اسلام آباد ءِ سروک دیوان نا روشنائی و پبی سجاوٹ نا کمک اٹ زیباغا شار ات بدل کننگا۔ اسلام آباد اٹی ڈل آتا جم وجوش اٹ بخیرکننگ کن سی ڈی اے خصوصی بست وبند کرے، ہرافتے ٹی پاکستان نا مہمانداری و جہانی کہول آ اہم کڑد ادا کننگ کن اونا لگن و عزم انا جھلک نظربریک۔