پاکستان ایس سی او سروک دیوان کن گچین بست وبندکرے، ملک اسے نا الس و اونا سافٹ دروشم ءِ گچین کننگ اٹ دودوربیدہ نااہم ءُ کڑد اس مریک، عطاء اللہ تارڑ

اسلام آباد۔ 16 اکتوبر (اے پی پی) بنجائی وزیر حوالکاری ، شینکاری ، قومی میرات و دودوربیدہ عطاء اللہ تارڑ پارینے کہ شنگھائی کمکار تنظیم سروک دیوان کن پاکستان گچین بست وبندکرے، ملک اسے نا الس و اوناسافٹ دروشم ءِ گچین کننگ اٹ دودوربیدہ نا اہم ءُ کڑد اس مریک، نن دنیا غا باورکرفینن کہ پاکستان اٹ بے پناہ لائخی ساڑی ءِ، پاکستان نا جہانی کہول آ تعلقداری نا بابت ایس سی او سروک کانفرنس مزل نا نشان ناحیثیت تخک۔ داہیت ءِ او چارشنبے نادے آ داڑے شنگھائی کمکار تنظیم ناسروک حکومت نا 23 می دیوان نا وخت آ میڈیا تون گپ وتران کرساپارے۔بنجائی وزیر حوالکاری پارے کہ پاکستان ایس سی او سروک دیوان کن گچین بست وبندکرینے، غٹ جہانی راہشون ومندوبین آک دابست وبند آتاستاءِ کرینو، اومیت ءِ  جہانی راہشون و مندوبین آک پاکستان آن جوان تاثر ہلسا کارہ۔ بنجائی وزیرپارے کہ بنجائی دارالحکومت اسلام آباد نا شمار دنیا نا زیبا انگا شارتیٹی مریک، داڑے مارگلہ ہل و راول جھیل اسلام آباد نا زیبا انگا سیل و سواتی ہند آک ءُ، اسلام آباد اٹی کلین اینڈ گرین چاگڑد ذکر انا قابل ءِ، ایئرکوالٹی انڈیکس گچین ءِ، ایس سی او سروک کانفرنس نا بشخ ہلوک آک بھاز گچین تاثرآتا درشانی ءِ کرینو۔ اوپارے کہ پاکستان نا جہانی کہول آ تعلقداری نا بابت ایس سی او سروک  کانفرنس مزل نا نشان نا حیثیت تخک۔ اوپارےکہ 27 سال آن پد بھلو ایونٹ اس پاکستان اٹی مننگ ءِ ہراننکن شرفمندی نا سوب ءِ۔ اوپارےکہ شنگھائی کمکار تنظیم نا بناشنگھائی فائیو نا پن اٹ بناکرے، اینو اونا 10 آخبتی باسک و اِر امبصر ملک ءُ۔ اوپارے کہ تدوک آ دے غٹ بروک آ مہمان تے بخیراٹ پاننگانے، اوفتا شرف اٹی وزیراعظم نا کنڈآن سُوارہ اس تننگا وخت اس کہ مہمان تیکن اسہ دودوربیدہ ئی دود اس ہم اڈتننگا ہرانا بھاز ستاءِ کننگا۔ بنجائی وزیر پارے کہ پاک چائنا فرینڈ شپ سینٹراٹی ایس سی او سروک کانفرنس نا کوریج ءِ کروک آ ہندی و درملکی صحافی تیکن میڈیا فیسلی ٹیشن سینٹر اس ہم جوڑ کننگانے، کوشست کننگانے کہ داسینٹر اٹی پوسکن آ آسراتی فراوان کننگے۔ اوپارے کہ چندی ملک آتیان بروک آصحافی داڑے ساڑی ءُ، اوفتے میڈیا فیسلی ٹیشن سینٹر اٹی اسہ چھت انا کیرغ آن غٹ آسراتی تے فراوان کننگانے، اوتینا کسبی فرض ءِ سرتننگ ءِ و تینا ملک آتیٹی ایس سی او سروک دیوان نا کوریج آتے سرکننگ ءُ۔ اوپارےکہ وزیراعظم محمد شہباز شریف اینو ایس سی او سروک کانفرنس اٹی علاقائی سلامتی و موسمیاتی بدلی تون اوار امن وسلامتی و اوغانستان نا بارواٹی ہیت کرے۔ اوپارے کہ داوڑنا فورم تیٹی ڈیہہ انا اجتماعی ویل آتون اوار زرکاری و واپار، زرگزران، امن، سیکورٹی و دودوربیدہ نا بابت باندات آتیا شرہ مریک۔ اوپارےکہ دے ٹک نیامی، چین، منگولیا، روس اتون اوار ایلو ملک آتون ننادودوربیدہ ئی قدر مشترک ءِ، ایس سی او سروک کانفرنس نا وخت آ مچ آ ڈیہہ انا دودوربیدہ غاتے تالان کننگانے۔ دودوربیدہ ئی تبادلہ غاتے مون آدننگ نا گرج آ زور شاغسا بنجائی وزیر حوالکاری پارے کہ ملک اسے نا الس و اونا سافٹ دروشم ءِ گچین کننگ اٹ دودوربیدہ نا اہم ءُ کڑد اس مریک۔   اوپارے کہ نن دنیا ءِ باور کرفینن کہ پاکستان اٹی بے پناہ لائخی ساڑی ءِ، اینو پاکستان ایس سی او دیوان نا کماشی ءِ کرے، ایس سی او نا کماشی پاکستان کن اعزاز اسے آن کم اف۔ اوپارے کہ بروک آغٹ مہمان تا منت وارا ُن، داکثیر الجہتی فورم اٹی اجتماعی ویل آتیا شرہ مریک، مون آ ہِننگ کن گپ وتران مریک، داڑتون اوار اوار ایس سی او سروک کانفرنس نا سائیڈ لائن آ ہڑتوم آکنڈآتا اوڑدہی ہم مننگ اٹی ءِ، وزیراعظم نا قزاخستان ، تاجکستان، ترکمانستان نا وزیراعظم و ایلو ملک آتا سروک آتون ہڑتوم آکنڈآتا اوڑدہی مس، دااوڑدہی زرکاری و واپار نا بابت بھاز اہم ئس۔ اوپارے کہ تین پہ تینی کمکاری، انڈسٹری، توانائی تون اوار ایلو بشخ آتیٹی اہم گپ وتران مس۔ اوپارے کہ بنجائی وزیر و فوکل پرسنک چندی ڈل آتون زرکاری وواپار نا بابت باندات آتے طے کریر۔