اسلام آباد۔ 05 جولائی (اے پی پی) نائب وزیراعظم و وزیرخارجہ و سینیٹ اٹی قائد ایوان اسحاق ڈار پارینے کہ نجکاری نا عمل پورو شفاف مریک، سی سی او پی نا سروک نا حیثیت اٹ ہم شفافیت ءِ پک کیوہ۔ جمعہ نادے آ سینیٹ نا دیوان اٹی ریاستی ملکیتی ادارہ غاتا بابت ترمیمی ایکٹ بل آ سینیٹر علی ظفر نااعتراضی ٹک انا ورندی ءِ ترسا اسحاق ڈار پارے کہ نجکاری نا بابت غٹ حکومتی سیوتی تے ہم پورو پت اٹ ہلنگک، پاکستان اسٹیل ملز انا نسخان اٹی ارب آ روپئی قوم انا زیان مسنے، انت نن پین دا نسخان تے سگنگ کینہ۔ اوپارے کہ پی ٹی سی ایل مشرف دور اٹی اتصالات ءِ بہاکننگا، داوخت آ مسہ پیش کش موصول مسوسس، اوکان پد پی ٹی آئی حکومت تون اوار کیہی حکومت آک بسر تو دا باندات ءِ انت اکن ایسر کننگتو، نن دا باندات ءِ ایسر کننگ نا کوشست کننگ اُن، پی ٹی سی ایل نامسہ نیم سد آن یک و نیم سد میرات جاٹ داسہ ہم اتصالات نا دوٹی تننگتنو۔ نن اوفتے 150 آن 30 میرات آتیا ایسُن، اتصالات دا میرات آتا تینا وڑاٹ نہاد ءِ خلفینے، دا پراپرٹیزنا 263 ملین ڈالر نہاد ءِ خلفنگا ہرابھاز کم ءُ۔
