اسلام آباد۔ 05 جولائی (اے پی پی) نائب وزیراعظم ووزیرخارجہ سینیٹر اسحاق ڈار پارینے کہ اسرائیلی جارحیت اٹی داتم اسکان 37 ہزار فلسطینی شہید و 20 لکھ بے اُرا مسنو، پاکستان داباندات آ اوآئی سی ، استنبول اٹی وزراء خارجہ دیوان اٹی ہم پبی توار بڑز کرینے۔ جمعہ نادے آ سینیٹ نادیوان اٹی فلسطین نا ویل آ تینا پالیسی بیان اٹی اوپارے کہ اسرائیلی جارحیت نا نتیجہ ٹی داتم اسکان 37 ہزار فلسطینی شہید و20 لکھ بے اُرا مسنو۔ پاکستان دا باندات آ اوآئی سی، استنبول اٹی وزراء خارجہ دیوان اٹی ہم پبی توار بڑزکرینے۔ عمان اٹی ہم 65 ملک آتا دیوان اٹی اسرائیلی بربریت ءِ تورفنگ کن توار بڑزکرے، داتم اسکان فلسطینی تیکن کمکی گڑاتا 9 کھیپ گدریفینے۔ اوپارے کہ پاکستان نا پیدوار موقف ءِ کہ اسرائیلی جنگی ڈوہ انا مرتکب مننگ ءِ، جنگی ڈوہ انا مرتکب مننگ آ اسرائیل نا برخلاف کارروائی کننگے۔ اوپارے کہ وزیراعظم ایس سی او دیوان اٹی ہم دا ویل آ توار بڑزکرے۔ پاکستان 1967آن مہالو نا سیم تیا تالان بیت المقدس نا دارالحکومت تون آجو فلسطینی ریاست نا مخ تف ءِ۔ اوپارے کہ انگلینڈ نا گڑاس تنظیمک غزہ ٹی میڈیکل نا طالب علم آتا ویل آتیان ننے معلومدار کرےہراڑآ نن پی ایم ڈی سی ءِ فلسطینی میڈیکل طالب علم آتا طبی تعلیم تننگ نا بارواٹی نوشتہ کریسس۔ پی ایم ڈی سی وزارت خارجہ نا موقف آ فلسطینی طالب علم آتے تینا زیر انتظام میڈیکل کالج آتیٹی تعلیم ءِ برجاتخنگ نا موکل تسنے۔
