اسلام آباد۔ 05 جولائی (اے پی پی) بنجائی وزیر حوالکاری، شینکاری، قومی میرات و دودوربیدہ عطاءاللہ تارڑ پارینے کہ اسرائیل جنگی ڈوہ انا ارتکاب کننگ ءِ، فلسطینی تا نسل کشی ءِ کننگ انگ ءِ، پاکستان شنگھائی کمکار تنظیم اٹ فلسطین نا مقدمہ تون پبی وڑاٹ مون تس، پاکستان خواست کرے کہ اسرائیل ءِ جوابدہ کننگے۔ جمعہ نادے آ سینیٹ نا دیوان اٹی وزیراعظم نا شنگھائی کمکار تنظیم نا سروکی دیوان اٹی بشخ ہلنگ نا بابت پالیسی بیان ترسا بنجائی وزیر حوالکاری پارے کہ اسرائیل جنگی ڈوہ انا ارتکاب کننگ ءِ، فلسطینی تا نسل کشی ءِ کننگ انگ ءِ، 37 ہزار آن زیات فلسطینی شہید مسنو ہرافتے ٹی زالبو ل وچناہم اوار ءُ، 20 لکھ فلسطینی تینا اُراتیان بے دخل مسنو و ہمپنگ آ بیوس ءُ۔ اوپارے کہ شنگھائی کمکار تنظیم نا دیوان اٹی پاکستان نا موقف ئس کہ 1967ء آن مہالو نا سیم تا رداٹ آزاد فلسطینی ریاست ءِ امنا کننگے ہرانا دارالحکومت القدس شریف مرے و فلسطین اٹ جنگی ڈوہ ءِ دمدستی وڑاٹ توننگے۔ بنجائی وزیر حوالکاری پارے کہ غزہ و رفح نا ہچ ءُ پرسان حال اس اف، ہموڑے ہسپتال آتیا بمباری کننگ انگ ءِ، زالبول و چناتے شست کننگ انگ ءِ و کمکی گڑا حقدار اسکان سرکننگ کن ہلنگ پننگ انگءِ ہرا بھاز بھلو المیہ سے ہراڑآ پاکستان شنگھائی کمکار تنظیم اٹی زور دار توار بڑز کرے و دوٹوک موقف پیش کرے۔ اوپارے کہ شنگھائی کمکار تنظیم اٹی اسلاموفوبیا نا بارواٹی ہم ہیت مس۔ سینیٹر سرمد نا سوج انا ورندی ٹی بنجائی وزیر حوالکاری پارے کہ 1997ء نا سروسز مینوئل نا رداٹ اشتہارجاری کننگک، 2021ء ٹی ایڈورٹائز منٹ پالیسی بسوسس ہراٹی 2022ء ٹی ترمیم کننگاسس ۔ اوپارےکہ زمانہ سے ٹی بیرہ پی ٹی وی نا کمک اٹ اشتہار چلینگاکہ، الیکٹرانک میڈیاکن ہچ ءُ دُن ءُ پیمانہ اس اف ہرانا رداٹ ہُننگے کہ ہراسٹ ءِ اخس ایڈورٹائز منٹ تروئی ءِ۔ ریٹنگ نظام پرائیویٹ میڈیا نا جوڑکروک ءِ۔ اوپارے کہ داوخت آ اسہ چینل اسے نا ہم اشتہار آک بند افس۔ غٹ ٹی وی چینل آتے اوفتا ریٹنگ نا رداٹ اشتہار تننگ انگ ءِ۔ اوپارے کہ اشتہار اٹی ہرامیسج ءِ تننگک اونا مسخت ءِ کہ او گچین وڑاٹ مخلوق اسکان سرمننگ کے۔ الیکٹرانک میڈیا نا بابت ریٹنگ نا نظام تینا جاگہ غا ساڑی ءِ وخت اس کہ نیوز پیپرنا بابت آڈٹ بیوروسرکولیشن ساڑی ءِ ہرااخبار تا سرکولیشن ءِ چیک کیک کہ ہرااخبار تا اخس سرکولیشن ءِ، اونا رداٹ اشتہارات تننگک۔ اوپارے کہ تدوک آ پنچ سال آتیٹی پرنٹ و الیکٹرانک میڈیا ءِ 16 ارب 6 کروڑ 81 لکھ 69 ہزار 105 روپئی نا اشتہار جاری کننگا ہرافتے ٹی پرنٹ میڈیا ءِ 9 ارب 48 کروڑ 66 لکھ 82 ہزار 855 روپئی نا اشتہارجاری کننگا وخت اس کہ الیکٹرانک میڈیا ءِ 6 ارب 58 کروڑ 14 لکھ 86 ہزار 250 روپئی نا اشتہار جاری کننگا۔ اوپارے کہ نیوز پرنٹ پیشن نا ملک آن درآمد کننگک، اوڑآ 10 درسد ڈیوٹی خلنگاسس، نن آل پاکستان نیوز پیپر سوسائٹی نا خواست آ و داہیت ءِ ہرسا کہ اخبار آک مشکل آتا گواچی ءُ ، بجٹ اٹ دا ڈیوٹی ءِ چٹفین و اخبار آتیا ہچءُ پوسکن ءُ خراج اس خلتون۔ اوپارےکہ پالیسی ءِ پین گچین کننگ ناگرج ءِ۔ کنا است خواہی ءِ کہ اے پی این ایس نا راہشونی اٹ سوگو و گچین پالیسی اس اتین ہرانا رداٹ دا سروسز مینوئل ہم اپ ڈیٹ مرے و 2021ء نا ایڈورٹائزمنٹ پالیسی ءِ پین فعال و گچین کننگے۔
