اسلام آباد۔ 05 جولائی (اے پی پی) وزیراعظم ناکوآرڈی نیٹر جان جوڑی ڈاکٹر ملک مختار احمد بھرتھ پارینے کہ نرسنگ نا جان جوڑی نا بشخ انا بشخ اٹی تمبہ نا حیثیت تخک، نیویارک اٹی پاکستانی نرس آتا ملازمت ناعمل ءِ آسان کننگ کن ریاستی کہول آ اسہ ایم اویو سے نا مسودہ ءِ تیار کننگ آ امنائی مسنے۔ وزارت جان جوڑی آن جاری بیان نا رداٹ داخیال آتا درشانی ءِ او نیویارک اسٹیٹ نا ڈپٹی اسپیکر فل راموس تون اوڑدہی ٹی گپ وتران کرساکرے۔ داوخت آ امریکن پاکستانی پبلک افیئرز کمیٹی نا چیئرمین ڈاکٹر اعجاز احمد ہم اوڑتون اوار ئس۔ اوڑدہی ٹی ہڑتوم آ کنڈآتا کمکاری و تین پہ تینی است خواہی نا امور آ گپ وتران کننگا۔ ڈاکٹر ملک مختار احمد بھرتھ نیویارک و امریکن پبلک افیئر کمیٹی تون کمکاری ءِ ودفنگ کن تینا پکا عزم انا درشانی ءِ کرے۔ ڈاکٹر ملک مختار احمد بھرتھ پارے کہ اوڑدہی نا مسخت پبلک و پرائیویٹ سیکٹر اٹی نرس آتا گرج آتے پورو کننگ کن آخبتی نا کمکاری آ لائحہ عمل اس ٹہیفوئی ئسک۔ اوپارے کہ نرسنگ نا جان جوڑی نا بشخ انا بشخ اٹی تمبہ نا حیثیت تخک۔ ایلو ملک آتیٹی نرس آتا ودوک آ مانگ ءِ مون آ تخسا گچین گام گیج آتے پک کرینے۔ پاکستان اٹ نرسنگ کالج و یونیورسٹی تا کچ اٹی ہم ودکی مسنے۔ اوپارے کہ اسلام آباد اٹی بحرین حکومت نا کمکاری آن اسٹیٹ آف آرٹ نرسنگ یونیورسٹی پوروی نا ریسہ غاتیٹی ءِ۔ اوپارےکہ نیویارک اٹی پاکستانی نرس اآتا ملازمت ناعمل ءِ آسان کننگ کن ریاستی کہول آ اسہ ایم اویو سے نا ڈرافٹ ءِ تیار کننگ آ امنائی مسنے۔ ساڑی حکومت جان جوڑی نا بشخ اٹی گچینی اتنگ کن سنبرینگوک ءِ۔ داوخت آ ڈپٹی اسپیکر فل راموس پارے کہ جان جوڑی نابشخ اٹی پاکستان تون بھلو تعلقداری اسے۔ مچ آپاکستان آن نرینہ و نیاڑی نرس ہلنگ نابھاز زیات گمان ارے۔
