اسلام آباد۔ 03 جولائی (اے پی پی) بنجائی وزیر مذہبی امور چوہدری سالک حسین پارینے کہ محرم الحرام اٹی امن و ایمنی ءِ برقرار تخنگ اٹ عالم دین تا کڑد بھاز اہم ءِ۔ چارشنبے نادے آ وزیر مذہبی امورمحرم الحرام اٹی بین المسالک ہم آہنگی و امن وایمنی نا بابت دیوان نا کماشی ٹی دیوان اٹی ہندی کہول آ راولپنڈی و اسلام آباد آن عالم دین و مشائخ عظام آک بشخ ہلکر۔ دیوان آن تران کرسا وزیر مذہبی امور پارے کہ تدوک آ سال تیانبار محرم الحرام اٹی ملک اٹی امن وا یمنی ءِ برقرارتخنگ اٹ عالم دین تا کڑد بھاز اہم ءِ۔ اوپارے کہ عالم دین و مشائخ عظام نا سلابت اٹ ملک اٹی اسٹی، ایلمی، و امن نا فضا ءِ برقرارتخنگ و مسلکی رواداری ءِ پک کننگ کن اسہ اسیجائی لائحہ عمل اس طے کننگانے۔ بنجائی وزیر مسلکی رواداری ءِ برقرارتخنگ کن عالم دین آتون صوبائی و ضلعی کہول آ ہم داوڑنادیوان اڈتننگ نا گرج آ زور شاغا۔ اوپارے کہ بین المسالک ہم آہنگی نا فضاء ءِ برقرارتخنگ کن قومی ، ملی و ملکی حالیت و باندات آتیٹی غٹ مکتبہ فکر انا عالم دین تا سیوت و سخانا گرج ءِ۔ داوخت آ اسہ جامع ضابطہ اخلاق اسے نا پڑو کننگانے۔ داوخت آ بنجائی سیکرٹری مذہبی امور ذوالفقار حیدر امنائی ضابطہ اخلاق نا پڑو کرسا پارے کہ 03 جولائی 2024 آ وزارت مذہبی امور و بین المذاہب ہم آہنگی اسلام آباد نا کمیٹی روم اٹی اسلام آباد/راولپنڈی نا چندی مسلک آن تعلق تخوک آ پنی آ عالم دین و مشائخ عظام، خطبہ و مذہبی شخصیت نا نمائندہ دیوان اٹی داہیت آ سجفنگانے کہ ہراوڑ محرم الحرام نا تُو اٹی امن و ایمنی نا حالیت آتے خراب مننگ آن بچفنگے۔
