اسلام آباد۔ 03 جولائی (اے پی پی) وزارت توانائی (پاور ڈویژن) سوشل میڈیا غا بنجائی وزیر پاور ڈویژن سردار اویس احمد خان لغاری نا پن اٹ بجلی نا بل انا وائرل مروک آ عکس انا تردید ءِ کرسا پارینے کہ داوڑنا ریفوک ءُ پروپیگنڈا تالان کرسا نئے بیرہ کڑد کشی کننگ نا کوشست کننگ انگ ءِ بلکن مخلوق نا جوزہ غاتون گوازی کننگ نا ناپاک حرکت کننگ انگ ءِ۔ ترجمان پاور ڈویژن چارشنبے نادے آ جاری بیان اٹی وضاحت کرینے کہ اگہ دا بل انا مطالعہ ءِ کننگ نا کوشست کننگے تو اونا مندرجہ غاک نمے صاف پاننگ ءُ کہ دا اسہ نئے بیرہ دروغ انا پروپیگنڈاسے بلکن دا ہیت انا گواہی ءِ ایتک کہ سردار اویس لغاری کانودنا پاسداری ءِ کیک و تینا قومی فرض ءِ جوان وڑاٹ پورو کیک۔ اوپارے کہ دابنجائی وزیر نا فورٹ منروہل سٹیشن نا اسہ بڑزکو بشخ اسے نا بل ءِ ہر ا زیر استعمال الوکہ و کانودی وڑاٹ دانا میٹرءِ اگست 2023 اٹی لاک کرفنگا دُن کہ یونٹ نا کالم اٹی نوشتہ کروک ءِ۔ ترجمان وضاحت تس کہ دسمبر 2023 اٹی دا بل ءِ کانودی وڑاٹ کاٹ کرفسا غٹ سلوک آ پیسہ 10,766روپئی ءِ اداکننگا ہرانا انٹری بل اٹ ہُننگ مریک۔ اوپارے کہ ہندا میٹر ءِ جون 2024 اٹی کانودی وڑاٹ بحال کرفنگا ہراڑآ داتم اسکان کاریم اٹ اتپننگ نا سوب آن ہچ ءُ لوڈ اس اوار اف۔ ترجمان پاور ڈویژن پارے کہ بنجائی وزیر سردار اویس احمد خان لغاری مدام خواری ولگن اٹ تینا غٹ ملکی فرض آتے سرتننگ آن بیدس کانودی خواست آتا عین رداٹ زند ءِ تیرکیک و داوخت آ ملک انا غٹ آن بھلا ویل زدہ سیکٹر ءِ سہی سمت اٹ اتنگ کن دے و نن بیدس تنخواہ یاآسودہی نا خذمت آتے سرتننگ ءِ۔ ترجمان الس آن خواست کرے کہ داوڑنا گمراہ کن پروپیگنڈا ہرانا گڑاک بل اٹی نوشتہ مروک راستکی تیان چپ ءُ، ناگواچی مفس و دا ناپاک و گندہ انگا عمل نا سخت مذمتءِ کیر۔
