کوئٹہ۔ 03 جولائی (اے پی پی) کمشنر کوئٹہ ڈویژن حمزہ شفقات ، ڈپٹی انسپکٹر جنرل آف پولیس کوئٹہ اعتزاز احمد گورایہ ایس ایس پی کوئٹہ آپریشن محمد بلوچ نا کماشی ٹی محرم الحرام نا چرجوئی ٹی امن کمیٹی نا دیوان اس اڈہلک۔ دیوان اٹی ڈپٹی کمشنر کوئٹہ سعد بن اسد، ڈویژن ایس پیز، ڈی ایس پیز و ایلو آفیسر آتون اوار اہل علاقہ نا پوریاگر ، راجی راہشون و ایلو سرکڑدہ غاک بشخ ہلکر۔ دیوان اٹی محرم الحرام نا سیکورٹی بست وبند و مون تروک ویل آتون اوار ایلو امور تیا گپ وتران کننگا، دیوان اٹی بشخ ہلوک آک تینا خیال آتا درشانی ءِ کرسا عشرہ محرم اٹی سیکورٹی نا بابت مون تروک ویل آتیان معلومدار کریر۔ داوخت آ پاننگا کہ محرم الحرام آن مست غٹ تر بست وبند آتے وخت آ پورو کننگک، غٹ روٹ آتا وزٹ ءِ کرسا سیکورٹی پوائنٹ آتے چیک کینہ، محرم الحرام نا غٹ مجلس و جلوس آتے فول پروف سیکورٹی تننگک، سیکورٹی نابابت مون تروک ویل آتے اولیت آتیا ایسر کینہ، منتظمین جلوس حکومتی پرمان تیا عملدرآمد ءِ پک کینہ۔ دیوان اٹی بشخ ہلوک آتا کنڈآن سیکورٹی باندات آتیٹی انتظامیہ تون پبی و پورو کمکاری نا باوری کرفنگا۔
