اسلام آباد۔ 03 جولائی (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ پاکستان امریکہ نا 76 سال انا سنگتی مشکل وخت اٹی ہم برقرار رہینگا، سرد جنگ و دہشت گردی نا برخلاف جنگ اٹی ہڑتوم آ ملک آتا تین پہ تینی سیوت تاریخی درور اس قائم کرے، چندی کسب آتون وابستہ 10 لکھ پاکستانی امریکہ ٹی آباد ءُ۔ داخیال آتا درشانی ءِ او امریکی یوم آزادی نا چرجوئی ٹی امریکی سفارت خانہ ٹی اڈ ہلوک دود آن تران کرساکرے۔ احسن اقبال پارے کہ منگلا و تربیلا ڈیم کون آمیگا پروجیکٹ آتا جوڑ کننگ امریکہ نا کمک اٹ ممکن مس ۔ اوپارے کہ چندی کسب آتون وابستہ 10 لکھ پاکستانی امریکہ ٹی آباد ءُ۔ مچ آ دنیا غان فل برائٹ اسکالر شپ نا رداٹ تعلیم دوئی کروک آتیٹی غٹ آن زیات کچ پاکستانی تا ءِ۔ کنے پنسلوانیا نا پنی آ وارٹن اسکول اٹی 1984 آن 1986 اسکان خواننگ نا موقع ملا۔ اوپارے کہ ای خناٹ ہراوڑ امریکی یونیورسٹیک ملک انا زرگزرانی شونداری ٹی اہم کڑد ادا کیرہ۔ 2013 ٹی امریکہ پاکستان نالج کوریڈور بناکرے۔ بروک آ دہ سال آتیٹی بڑزکو امریکی یونیورسٹی تیٹی 10 ہزار پاکستانی طالب علم پی ایچ ڈی نا تعلیم دوئی کیرہ۔ احسن اقبال پارے کہ 2023اٹی ہڑتوم آ ملک آتا نیام اٹ واپار 12 بلین ڈالر آن گدرینگا۔ تین پہ تینی واپار ءِ ودفنگ کن ہڑتوم آملک آتا نیام اٹ امنائی سلاہ ءِ۔ واپار و زرکاری ، توانائی، انسداد دہشت گردی، تعلیم، آئی ٹی و دفاع نا بشخ ہڑتوم آ کنڈآتا ڈائیلاگ میکنزم جوڑ کننگانے۔ اوپارے کہ 2022 نا نوکاپ اٹی فراوان کروک کمک آ امریکہ نا منت وار ءِ۔ 1960 نا دہائی ٹی کشت وکشارنا بشخ اٹی سوز انقلاب پاکستان اٹ اہم شونداری ءِ پک کرے۔ غذائی رکھ و چاگڑدی بدلی تا منفی اثرآتیان رکھ ءِ پک کننگ کن ننے سوز انقلاب 2.0 نا گرج ءِ۔
