بی آئی ایس پی ٹی شفافیت ءِ پک کننگ انگ ءِ، وسیلہ تعلیم و وسیلہ روزگار پروگرام نا زوت بناءِ کننگک، چیئرپرسن سینیٹرو روبینہ خالد

لاہور۔ 02 جولائی (اے پی پی) چیئرپرسن بے نظیر انکم سپورٹ پروگرام روبینہ خالد پارینے کہ وزیراعظم محمد شہباز شریف نا پارت آ بی آئی ایس پی ٹی شفافیت ءِ پک کننگ انگ ءِ ، عزت نفس ءِ مجروح کننگ آن بیدس ادائیگی تا فراوانی اولیت ءِ، جعل سازی نا چٹفنگ کن وزارت آئی ٹی تون اواری اٹ کاریم کننگ اُن، داپروگرام نیزگاری نا چٹفنگ کن اہم کڑد ادا کننگ ءِ وسیلہ تعلیم و وسیلہ روزگار پروگرام نا زوت بناءِ کننگک، بے نظیر انکم سپورٹ پروگرام نا رداٹ 95 لکھ حقدار بندغ فائدہ ہرفنگ ءُ، نن داکچ ءِ ودفنگ خوانہ۔ داخیال آتا درشانی ءِ او سے شنبے نادے آ داڑے بی آئی ایس پی آفس نا دورہ نا وخت آ میڈیا تون گپ وتران اٹی کرے۔ چیئرپرسن روبینہ خالد پارے کہ بینظیر انکم سپورٹ پروگرام اٹی اصلاحات اتنگانے، بی بی شہید نا ویژن نا رداٹ پوسکن پروگرام نا بناءکننگ انگ ءِ، وسیلہ تعلیم و وسیلہ روزگار پروگرام نا زوت بناءِ کننگک، پوسکن آ پروگرام تیان حقدار خودکفالت نا کنڈآ ہِننگ کینہ۔ اوپارے کہ داپروگرام نا خوبی دادے کہ داٹی نیزگار و حقدار زالبول آتا زیات آن زیات دادرسی ءِ کننگانے، پروگرام نا کمک اٹ زالبول آتے نئے بیرہ اسہ شناخت اس تننگا بلکن اوفتے زرگزرانی وڑاٹ ہم سوگو کننگانے۔ راج اٹ ہرافتا ہچ ءُ شناخت اس الوکہ ہموزالبول آتے داپروگرام آن امداد تننگ انگ ءِ۔