حریت کانفرنس نا ڈل انا وزیراعظم پاکستان نا سلاہکار شبیر احمد عثمانی تون اوڑدہی ، بھارت نا غیرکانودی کوزہ ٹی جموں وکشمیر نا تازہ انگا حالیت آتیان معلومدار کرے

اسلام آباد۔ 02 جولائی (اے پی پی) کل جماعتی حریت کانفرنس آزاد کشمیر شاخ نا کنوینر غلام محمد صفی نا کماشی ٹی حریت راہشون تیا تالان اسہ ڈل اس سے شنبے نادے آ داڑے کشمیر نا بارواٹی وزیراعظم پاکستان نا سلاہکار شبیر احمد عثمانی تون اوڑدہی کرے و اودے بھارت نا غیرکانودی کوزہ ٹی جموں وکشمیر نا تازہ انگا حالیت آتیان معلومدار کرے۔ حریت کانفرنس نا کنڈآن جاری بیان نا رداٹ شبیر احمد عثمانی داوخت آ جموں وکشمیر اٹی بھارتی فورس آتا کنڈآن برجا انسانی حق انا بھلا خلاف ورزی و گندہ انگا ڈوہ تے تالان کننگ نا گرج آ زور شاغا تانکہ بھار ت نا اصل دروشم بے نقاب مننگ کے۔ اوپارے کہ پاکستان کشمیری الس نا حق خودارادیت نا انصاف اٹ جہد نا مخ تفی ءِ برجاتخک۔ اوپارے کہ پاکستانی الس تینا کشمیری ایلم تتون سلوک ءِ و پاکستان حق خودارادیت نا دوئی کننگ کن کشمیری الس نا جہد اٹی اوفتا سیاسی ، سفارتی و اخلاقی مخ تفی ءِ برجاتخک ۔ شبیر احمد عثمانی پارے کہ بھارت تینا غیرکانودی کوزہ ٹی جموں وکشمیر اٹی آبادی نا کچ ءِ بدل کننگ نا عمل ءِ ترند کننگ نا کوشست کننگ ءِ و غیرکشمیری تے علاقہ ٹی آباد کننگ کن کم وود 45 لکھ ڈومیسائل جاری کرینے۔ اوپارے کہ بھارت کشمیری تا ڈغار ءِ غیرکشمیری تے بہاکننگ ءِ۔ اوپارے کہ دا کارروائی سلامتی کونسل نا قرارداد و چارمیکو جنیوا کنونشن تون اوار جہانی کانود نا پاش آن پاش خلاف ورزی ءِ۔