وزیراعظم نا بشام اٹی غٹ تعلقدار ادارہ غاتے ہائی الرٹ مننگ نا پارت، ہروڑنا ہلہلہ ئی حالیت آتون مون تننگ کن بڑزکوکہول انا کمیٹی اس جوڑ کرے

اسلام آباد۔ 02 جولائی (اے پی پی) وزیراعظم محمد شہباز شریف بشام اٹی غٹ تعلقدار ادارہ غاتے ہائی الرٹ مننگ نا پارت کرسا ہروڑنا ہلہلہ ئی حالیت آتون مون تننگ کن بڑزکو کہول انا کمیٹی اس جوڑ کرے۔ وزیراعظم آفس نا میڈیا ونگ آن جاری بیان نا رداٹ داپارت آتے وزیراعظم سے شنبے نادے تینا کماشی ٹی بشام نا پیشگوئی و اوڑآن ودی مروک آ ہلہلہ ئی حالیت آتون مون تننگ کن جاچ دیوان اٹی کرے۔ دیوان اٹی  بنجائی وزیر احدخان چیمہ، عطاء اللہ تارڑ، رانا تنویر حسین، چیئرمین این ڈی ایم اے لیفٹیننٹ جنرل انعام حیدر ملک و تعلقدار بڑزکو کمامدارآک بشخ ہلکر۔ دیوان اٹی ہرچار آ صوبہ غاتا چیف سیکرٹریک ویڈیو لنک انا کمک اٹ بشخ ہلکر۔ دیوان اٹی وزیراعظم بشام آن ودی مروک آ گمانی نوکاپی حالیت آتا تینٹ چاروکی ءِ کننگ نا فیصلہ کرینے۔ وزیراعظم بشام اٹی غٹ تعلقدار ادارہ غاتے ہائی الرٹ مننگ نا پارت کرے۔ وزیراعظم بشام نا بابت ہروڑنا ہلہلہ ئی حالیت آتون مون تننگ کن بڑزکو کہول انا کمیٹی اس جوڑ کرے۔ وزیراعظم پارت کرے کہ این ڈی ایم اے غٹ صوبائی حکومت و تعلقدار ادارہ غاتا بشام نا بابت کمکاری ءِ کے، ہلہلہ ئی حالیت آتیٹی گمانی وڑاٹ زہمی علاقہ غاتا مخلوق نا بشام نا بابت پیشگی حوالکاری نا فراوانی ءِ پک کننگے۔ وزیراعظم پارے کہ بزغر و دریاو جوو نالی تا کیبی ٹی رہینگوک مخلوق ءِ ہڑدے ئی بنداو آ میڈیا وایلو ذریعہ غاتے اٹ پیشگی حوال تننگے۔ وزیراعظم پارت کرے کہ بشام نا بابت پیشگی حوالکاری تے قومی شینکاری نا بشخ کننگے، بزغرآتے باقاعدگی اٹ موسم نا حالیت آتیان معلومدار تخنگے۔ ہروڑنا ہلہلہ حالیت آتیٹی بزغرآتا پبی کمکاری ءِ کننگے۔ دیوان اٹی این ڈی ایم اے نا کنڈآن بشام نا داتم اسکان پیش گوئی و گمانی خطرہ غاتا گواچی علاقہ غاتیا سرجمی اٹ حوال تننگا۔ حوال اٹی پاننگا کہ جولائی نا اولیکو و ارٹ میکو ہفتہ ٹی  ہرچار آ صوبہ غاتیٹی بشام نا ترند انگا پِرتاگمان ءِ۔ برجاسال بشامی آ پِرتا چرجوئی پاکستان اٹ سویل دے ٹک آن مرسا قطب نا کنڈآ کاہک۔ جولائی نا اولیکو ہفتہ ٹی پوٹھوہار و پنجاب نا دے ٹکی بشخ اٹی پِر تا گمان ءِ۔ جولائی نا ارٹ میکو ہفتہ ٹی راولپنڈی، سرگودھا، گجرانوالہ ، لاہور و فیصل آباد اٹی شنزئی  وخت اس کہ بہاولپور، ملتان، ساہیوال و ڈیرہ غازی خان ڈویژن اٹی جاگہ جاگہ پِر تا گمان ءِ۔ حوال اٹی پاننگاکہ اگست نا اولیکو اِرا ہفتہ ٹی ستلج ، چناب و راوی ٹی نوکاپی حالیت آتا گمان ءِ۔