کینڈا پاکستان نا مرکزی شونداری شریدار ءِ، بنجائی وزیر حوالکاری عطاء اللہ تارڑ نا کینیڈا نا ہائی کمشنر لیسلی اسکینلون تون گپ وتران

اسلام آباد۔ 02 جولائی (اے پی پی) بنجائی وزیر حوالکاری، شینکاری ، قومی میرات و دودوربیدہ عطاء اللہ تارڑ پاکستان وکینڈا نا نیام اٹ سوگو تعلقداری نا اہمیت آ زور شاغسا پارینے کہ کینیڈا پاکستان نا مرکزی شونداری شریدار ءِ، زرگزرانی تعلقداری ٹی ودکی ہڑتوم آ ملک آتا فائدہ ٹی ءِ۔ داہیت ءِ او کینیڈا نا ہائی کمشنر لیسلی اسکینلون تون اوڑدہی ٹی گپ وتران کرسا پارے۔ اوڑدہی ٹی پاکستان و کینیڈا نا نیام اٹ تعلقداری، حکومت پاکستان نا زرگزرانی گام گیج آتون اوار چندی اہم امور آ گپ وتران مس۔ کینیڈا نا ہائی کمشنر بنجائی وزیر حوالکاری ءِ وزارت حوالکاری تون دودوربیدہ و قومی میرات نا ودکی قلمدان ءِ سنبھالنگ آ مبارکبادی تس۔ بنجائی وزیر حوالکاری پارے کہ پاکستان و کینیڈا نا نیام اٹ دیرپاو کثیر الجہتی تعلقداری ءِ، کینیڈا پاکستان نا مرکزی شونداری شریدار ءِ۔ بنجائی وزیر حوالکاری ہڑتوم آملک آتا نیام اٹ زرگزرانی تعلقداری تے پین سوگو کننگ نا گرج آ زور شاغسا پارینے کہ زرگزرانی تعلقداری ٹی ودکی ہڑتوم آ ملک آتا فائدہ ٹی ءِ۔ داوخت آ کینیڈین ہائی کمشنر حکومت پاکستان نا زرگزرانی گام گیج آتا ستاءِ کرے۔