پاک چین سٹریٹجک پارٹنر شپ آن آئی ٹی نا بشخ اٹی بھلو وارخواہی اس ودی مریک، شزہ فاطمہ

بیجنگ۔ 02 جولائی (اے پی پی) آئی ٹی و ٹیلی کمیونیکیشن نا وزیر مملکت شزہ فاطمہ خواجہ پارینے کہ پاکستان و چین نا نیام اٹ سدابہار تزویراتی کمکاری آ تالان شریداری آن آئی ٹی نا بشخ اٹی بے مٹ وارخواہی ودی مریک، چین پاکستان اقتصادی راہداری (سی پیک) پاکستان وچین نا نیام اٹ ہڑتوم آ کنڈآتا کمکاری نا بنداو نا وڑاٹ کاریم کیک ہرا اسیجائی ڈٹ و ٹیکنالوجی آ تالان گام گیج کن ہم بھازانگا وارخواہی فراوان کیک، سی پیک نا ڈٹ آتیٹی ڈیجیٹل ٹیکنالوجی نا انضمام آن زرگزرانی شونداری، روزگار نا وارخواہی ودی کننگ و پائیدار شونداری نا پوسکن ءُ کسر ملنگک۔ داخیال آتا درشانی ءِ او سے شنبے نادے آ گلوبل ڈیجیٹل اکانومی کانفرنس 2024 نا بنائی دود آن تران کرسا کرے۔ وزیرمملکت پارے کہ پاکستان  وچین نا نیام اٹ تزویراتی شریداری آئی ٹی نا بشخ اٹی کمکاری نا بے مٹ وارخواہی ودی مریک ،دافتے ٹی مصنوعی ذہانت، سائبر سیکورٹی ، ای کامرس، ڈیجیٹل انفراسٹرکچر نا بشخ، اسیجائی ڈٹ، معلومداری تا ہل و تس و نیٹ ورکنگ آن بیدس مہارت نا شونداری کن بے پناہ گمان ساڑی ءِ۔ اوپارے کہ چین نا آئی ٹی مارکیٹ نا گیشتر لائخی درملکی کمپنی بشمول پاکستان نا کمپنی تیکن تینا کاروبار و برآمد آتے ودفنگ نا اسہ اہم موقع اس فراوان کیک۔ پاکستان وچین نا نیام اٹ شریداری پدریسہ مون آ ہِننگ ءِ ہرا کمکاری وتین پہ تینی شونداری نا متکن آ روایت نا ڈیک ءِ، دا شریداری انفارمیشن ٹیکنالوجی (آئی ٹی ) نا بشخ اٹی گیشتر گمان تے پٹنگ کن کاریمی پک مریک۔