کوئٹہ۔ 10 جون (اے پی پی) مچ آ قوم ملک آن دہشت گردی نا چٹفنگ اسکان فوج اتون ہم کوپہ سلوک ءِ۔ دہشت گرد آک اسُل تینا ناپاک عزم اٹی سرسہب مننگ کپسہ۔ داخیال آتا درشانی ءِ سینیٹر ثمینہ ممتاز زہری لکی مروت نا علاقہ ٹی سیکورٹی فورس آتا گاڈی نا خڑک بارودی سرنگ نادھماکہ ٹی کیپٹن محمد فراز الیاس تون اوار 7 سیکورٹی کارندہ غاتا شہیدی آ ڈکھیائی و است ہسونی نا درشانی ءِ کرساکرے۔ اوتینا مذمتی بیان اٹی پارے کہ لغور دشمن داوڑنا کارروائی تے اٹ ننا پکا عزم ءِ شیف شاغنگ کپک۔ غٹ شہید آک قوم انا ہیروک ءُ و مچ آ قوم و اوفتا خاہوت ءِ شہید آتا وطن کن بے مٹ قربانی تیا گمر ءِ۔ اوکیپٹن محمد فراز الیاس تون اوار غٹ شہید سیکورٹی کارندہ غاتا قربانی تے خراج عقیدت پیش کرے و پارے کہ شہید آتا دترنا اسہ اسہ پڑی نا حساب ءِ ہلنگک۔ اومستی پارے کہ ملک دشمن زموار آک و لغور دشمن مون آ برسا مقابلہ ءِ کننگ نا ہمت تخپک ہندا خاطر آن ڈکھوئی اٹ جلہو کیک۔ سینیٹر ثمینہ ممتاز زہری پارے کہ آخیریکو دہشت گرد انا چٹفنگ اسکان سیکورٹی فورس و قوم انا عزم کم مفک۔ پاک فوج و ایلو سیکورٹی فورس آک وطن نا رکھ اٹی دے و نن چوکنا و دہشت گرد آتا مون آ سوگو ءُ دیوال اسےآنبار سلوک ءُ و داوڑنا ہرکارروائی نا پبی ورندی ءِ تننگ کن ہروخت تیار ءُ، اوپارے کہ مچ آ قوم ملک آن دہشت گردآتا چٹفنگ اسکان تینا سیکورٹی ادارہ غاتون تفوک ءُ و دامسخت اٹ ہروڑناقربانی ایترہ۔ اوداعزم انا درشانی ءِ کرے کہ ملک دشمن تا پاکستان نا امن و شونداری ءِ لتاڑنگ نا ہرکوشست ءِ بے سہب کننگک۔ سینیٹر ثمینہ ممتاز زہری کیپٹن محمد فراز الیاس تون اوار غٹ شہید آتا خاہوت آتون ہڑزخواہی نا درشانی ءِ کرسا دعاکرے کہ اللہ تعالیٰ شہید آتے تینا جوار رحمت اٹ بڑزکو ہند اس عطاکے و پدسلوک آتے صبر وجمیل عطاکے۔
