کوئٹہ۔ 10 جون (اے پی پی) صوبائی سلاہکار صنعت و حرفت میر علی حسن زہری لکی مروت اٹی پاک فوج انا کانوائے آ بارودی سرنگ انا جلہو اٹی سیکورٹی کارندہ غاتا شہیدی آ ڈکھیائی و غم و غصہ نا درشانی ءِ کرینے۔ اوتینا بیان اٹی واقعہ نا ترند انگا لوز آتیٹی مذمت ءِ کرسا پارے کہ داوڑنا لغور کارروائی تیان قوم انا حوصلہ ءِ پست مفک۔ اوواقعہ ٹی کیپٹن محمد فراز الیاس تون اوار غٹ شہید سیکورٹی کارندہ غاتا قربانی تے خراج عقیدت پیش کرسا پارے کہ شہید آتا دترنا اسہ اسہ پڑی نا حساب ءِ ہلنگک۔ مچ آ قوم ملک آن دہشت گردی نا چٹفنگ اسکان فوج اتون ہم کوپہ سلوک ءِ۔ دہشت گرد آک اسُل تینا ناپاک عزم اٹی سرسہب مننگ کپسہ۔ صوبائی سلاہکار صنعت و حرفت میر علی حسن زہری مستی پارے کہ پاکستانی قوم تینا سیکورٹی فورس آتون ہم کوپہ عزم و ہمت اٹ دہشت گرد آتا مقابلہ ءِ کننگ اٹی ءُ و زوت دا لغور دہشت گرد آتے اوفتا ایسر اسکان سرکننگک۔ اوپارے کہ مچ آ قوم ملک آن دہشت گرد آتا چٹفنگ اسکان تینا سیکورٹی ادارہ غاتون تفوک ءِ، و دامسخت اٹ اسہ قربانی اسے آن ہم دریغ کپسہ۔ اوداعزم انا درشانیءِ کرے کہ ملک دشمن زموار آتا پاکستان نا امن و شونداری ءِ لتاڑنگ نا ہرکوشست ءِ بے سہب کننگک۔ میر علی حسن زہری کیپٹن محمد فراز الیاس تون اوار غٹ شہید آتا خاہوت آتون ہڑزخواہی نا درشانی ءِ کرسا دعاکرے کہ اللہ تعالیٰ شہید آتے جنت اٹ بڑزکو ہند اس عطاکے و پدسلوک آتے صبر وجمیل عطاکے۔ صوبائی سلاہکار میر علی حسن زہری پارے کہ آخیریکو دہشت گرد نا چٹفنگ اسکان سیکورٹی فورس و قوم انا عزم کم مفک۔ پاک فوج و ایلو سیکورٹی فورس آک وطن نا رکھ اٹی دے و نن چوکنا و دہشت گرد آتا مون آ سوگو ءُ دیوال اسےآنبار سلوک ءُ و داوڑنا ہرکارروائی نا پبی ورندی ءِ تننگ کن ہروخت تیار ءُ۔ اوپارے کہ وطن نا رکھ اکن تینا جون تے ندر کروک آک پک کریر کہ پاک وطن نا رکھ سوگوآ دوتیٹی ءِ۔ میر علی حسن زہری پارے کہ پاک فوج انا بہادر ورناو آفیسر آک ملک انا بقاء نا خاطر تینا جون تے ندرکریر ہراڑکن قوم شہید آتے خراج تحسین پیش کیک۔ شہید آتا خاہوت آتا حوصلہ ، استقامت و صبر قوم و سیکورٹی فور س آتیکن سوگوی نا سوب ءِ۔
