لاہور۔ 10 جون (اے پی پی) وزیراعظم محمد شہباز شریف دوشنبے نادے آ قصور اٹی لکی مروت دہشت گرد جلہو اٹی شہید مروک آ کیپٹن محمد فراز الیاس نا نمازءِ جنازہ ٹی بشخ ہلک۔ وزیراعظم محمد شہباز شریف کیپٹن محمد فراز الیاس نا میت ءِ کوپہ ہم تس۔ نماز ءِ جنازہ ٹی بنجائی وزیر حوالکاری و شینکاری عطاء اللہ تارڑ، انسپکٹر جنرل پنجاب تون اوار ایلو بڑزکو سول و فوجی آفیسر ورناک ہم بشخ ہلکر۔ وزیراعظم اوکان پد کیپٹن فراز الیاس شہید نا خاہوت تون ہڑزخواہی نا درشانی ءِ کرے۔ وزیراعظم محمد شہباز شریف شہید انا خلق ءِ ماڈل ویلج اس جوڑ کننگ نا پڑو کرسا خلق ءِ فراز الیاس شہید نا پن اٹ کننگ نا پرمان تس۔ وزیراعظم شہباز شریف پارے کہ قوم ءِ تینا بہادر گلزادہ غاتیا گمر ءِ ، لغور دہشت گرد امن نا ننا عزم ءِ متزلزل کننگ اٹ سرسہب مننگ کپسہ۔ وزیراعظم پارے کہ اللہ تعالیٰ اسٹ اسٹ ءِ داعظیم ہند ءِ ایتک، قرآن مجید اٹی فرمان ءِ کہ شہید ءِ مڑدہ پاپبو دازندہ ءِ، شہید کیپٹن فراز الیاس تینا خاہوت نا بخشش نا سوب جوڑ مریک۔ اوپارے کہ پاک فوج انا ہزار آ ورناک جون تے ندر کریر۔ ای باوری کرفیوہ کہ شہید انا عظیم قربانیک زیان مفسہ، شہید انا دترضرور رنگ اس اتیک۔ محمد شہباز شریف پارے کہ وطن نا خاطر جون ءِ تروک آتا قربانی تے اسُل است آن دننگ مفک۔ ارض پاک آن دہشت گرد آتے چٹفساگڑا آسرات تولنہ۔ اوکان پد لکی مروت جلہو اٹی شہید مروک آ کیپٹن محمد فراز الیاس نا پورو فوجی اعزاز اتون تدفین ءِ کننگا۔ وزیراعظم شہید انا قبرآ حاضری تس، دعاپاتیاکرے، قبرآ پھل تخا و شہید انا درجہ غاتا بڑزی کن دعاکرے۔ قصور نا خلق رائے کلاں غان تعلق تخوک آ 26 سالہ شہید کیپٹن محمد فراز الیاس لکی مروت ناخڑک فرض انا ادائیگی ٹی آئی ای ڈی جلہواٹی جیرت و بہادری نا درشانی ءِ کرسا شہیدی نا جام ءِ نوش کرے۔
