اسلام آباد۔ 07 جون (اے پی پی) اسپیکر قومی اسمبلی سردار ایاز صادق پاکستان نا اقوام متحدہ نا سلامتی کونسل نا بے آخبتی باسک گچین مننگ آ قوم ءِ مبارکبادی تسنے۔ جمعہ نادے آ قومی اسمبلی سیکرٹریٹ آن جاری بیان نا رداٹ تینا تہنیتی کلہو اٹی اسپیکر پارے کہ پاکستان نا 182 وونٹ اتون اقوام متحدہ نا سلامتی کونسل نا باسک گچین مننگ بھلو سفارتی سرسہبی اسے۔ دا سرسہبی جہانی برادری نا پاکستان آ پت انا درشانی ءِ۔ جہانی امن وسلامتی کن پاکستان تینا زمواری تے پبی وڑاٹ ادا کننگ اٹی ءِ و مون آ ہم کرسا کیک۔ اسپیکر قومی اسمبلی پارے کہ پاکستان جہانی امن، سوگوی وپائیدار شونداری کن جہانی برادری تون پبی کمکاری ءِ برجاتخک۔ اسپیکر وزارت خارجہ و ایلو اسٹیک ہولڈر آتا دا چرجوئی ٹی سفارتی کوشست آتا ستا ءِ کرے و اوفتے مبارکبادی تس۔
