وزیراعلیٰ بلوچستان میر سرفراز بگٹی تون جمہوریہ کوریانا سفیر مسٹر پارک کیجون نا اوڑدہی، چندی بشخ آتیٹی تین پہ تینی کمکاری آ گپ وتران

کوئٹہ۔ 06 جون (اے پی پی) وزیراعلیٰ بلوچستان میر سرفراز بگٹی تون پنچ شنبے نادے آ داڑے جمہوریہ کوریانا سفیر مسٹرپارک کیجون اوڑدہی کرے۔ اوڑدہی ٹی ہڑتوم آ راہشونک بلوچستان اٹی سیل و سوات، آئی ٹی، لائیو اسٹاک تون اوار چندی بشخ آتیٹی تین پہ تینی کمکاری و زرکاری نا مون آ دننگ آ گپ وتران کریر۔ اوڑدہی ٹی وزیراعلیٰ بلوچستان شرفمند آ مہمان سفیر نا کمک اٹ کورین زرکارآتے بلوچستان نا دورہ نا سلہ و چندی بشخ آتیٹی زرکاری نا سلہ خلسا پارے کہ آخبت نا قومی زرگزران اٹی بلوچستان نا اہم ءُ کڑد اسے بلوچسان نا مریس کرکی پٹی، فشریز ، لائیو اسٹاک منرل اینڈ مائینز و سیل و سوات نا بشخ آتیٹی داڑے زرکاری نا بےپناہ وارخواہی ساڑی ءِ۔ وزیراعلیٰ باوری کرفے کہ کورین زرکار آتے بلوچستان اٹ سازگار چاگڑد وپور و رکھ فراوان کینہ و زرکاری ٹی ہرممکن آسودہی ایتنہ۔ میر سرفراز بگٹی کورین سفیر ءِ معلومدار کرے کہ صوبائی حکومت 30 ہزار ورناتے کسبکاری نا تربیت فراوان کرسا پیشن نا ملک روزگار نا وارخواہی فراوان کننگ نا جوان ءُ پلان اس ٹہیفنگ ءِ ہراڑان نئے بیرہ دا ورناک تینا خاہوت آتا کفالت نا ذریعہ مریرہ بلکن زرمبادلہ نا ترسیل نا سوب آن ملکی زرگزران نا سوگوی نا سوب ہم جوڑ مریک۔ وزیراعلیٰ بلوچستان کوریانا کنڈآن کوئٹہ ٹی آئی ٹی پارک انا تفنگ نا ڈٹ آتا ستاءِ کرسا اودے پوسکن آ دور انا خواست آتا رداٹ بلوچستان نا ورناتیکن مثبت وارخواہی تا فراوانی نا اہم پیش رفت گوندا۔ میر سرفراز بگٹی پارے کہ پاکستان وکوریا نا نیام اٹ بے مٹ تعلقداری ءِ قدر انا نظر اٹ ہرنہ و واپاری و سفارتی کہول آ دا تعلقداری تے پین پائیدار و سوگو کننگک۔