نیویارک۔ 06جون (اے پی پی) پاکستان،ترکیہ و انڈونیشیا ودوک آ اسلامو فوبیا تون مون تننگ کن یکجا مننگ نا عزم انا درشانی ءِ کرینو۔ مسلمان تتون خار انا ودوک آ لہر نا نیام اٹ ، پاکستان، ترکیہ و انڈونیشیا نا سینئر سفارت کار آک اسلاموفوبیانا مقابلہ ءِ کننگ کن تینا حکومت آتا اجتماعی عزم انا درشانی ءِ کرسا امن، رواداری و بین المذاہب مکالمہ نا ہم وکالت ءِ کریر۔ اونیویارک اٹی ترکی نا قونصلیٹ جنرل اٹ ہرمسٹ آ اسلامی ملک آتا قونصل جنرل آتا اسیجائی مہمانداری ٹی اڈہلوک دود آن تران کریرہ۔ پاکستان نا قونصل جنرل عامر احمد اتوزئی تینا تران اٹی اسلام نا بنداوی اصول ، اعتدال، تکثیریت، ہمدرددی و سگ آ زور شاغا۔ اوانتہاپسند آتا اسہ اقلیت اسے نا کنڈآن اسلام نا غلط تشریح و 11/9نا واقعہ غان پد آن اسلاموفوبیا نا تشویشناک ودکی ءِ تالان کرے، ہراٹی مسلمان تا برخلاف خارتس تقریر، بیدادی و ادارہ جاتی امتیازی سلوک اوار ءِ۔ پاکستانی سفارت کار ‘‘اسلامو فوبیا تون مون تننگ کن گام گیج’’ نا بارواٹی اقوام متحدہ نا جنرل اسمبلی نا قرارداد نا ساڑی آ منظوری ٹی ترکیہ و انڈونیشیا تون پاکستان نا فعال کڑد آہم زور شاغا۔ ہراٹی اسلاموفوبیاتون مون تننگ کن اقوام متحدہ نا خصوصی مندوب نا تقرری نا خواست ہم اوار ءِ۔
