بیجنگ۔ 06جون (اے پی پی) وزیراعظم محمد شہباز شریف پارینے کہ پاکستان کشت وکشار نا بشخ انا کچ ءِ ودفنگ کن چینی آزموندہ غاتیان فائدہ ہرفنگ خواہک، حکومت گورننس نا گچینی، خراج نیٹ ءِ ودفنگ و کاروبار اٹ آسانی نا بابت گام گیج کننگ ءِ، ریلوائی ٹی لائن ون نا اپ گریڈیشن نا ڈٹ زرکاری کن بالکل تیار ءِ، چائنا ایگزم بینک پاکستان نا زرگزرانی شونداری ٹی اہم کڑد ادا کرینے۔ اوداخیال آتا درشانی ءِ چائنا ایکسپورٹ امپورٹ بینک (سی ای ایکس آئی ایم) نا چیئرمین ڈاکٹر ووفلن تون گپ وتران کرسا کرے ہرا وزیراعظم تون داڑے اوڑدہی کرے۔ اوڑدہی ٹی نائب وزیراعظم ووزیرخارجہ اسحاق ڈار، وزیردفاع خواجہ محمد آصف، بنجائی وزیر ڈٹ بندی احسن اقبال، بنجائی وزیر خزانہ و محصولات محمد اورنگزیب، وزیر پیٹرولیم مصدق ملک، بنجائی وزیر حوالکاری و شینکاری عطاء اللہ تارڑ، بنجائی وزیر پاور اویس احمد خان لغاری و وزیراعظم نا خصوصی کمکار طارق فاطمی ئسک ہم ساڑی ئسر۔ اوڑدہی ٹی وزیراعظم حکومت پاکستان نا اصلاحاتی ایجنڈا ءِ مون آتخسا گورننس نا گچینی خراج نیٹ ءِ ودفنگ و کاروبار کننگ اٹ آسانی نا بابت حکومت پاکستان نا کوشست آتا ذکر ءِ کرے تانکہ براہ راست درملکی زرکاری ءِ اتنگ مرے۔ اوپارے کہ اصلاحاتی گام گیج آتا نتیجہ مون آ بننگ بناکرینے انتئے کہ غذائی بشخ اٹی کبینی آ بھلو حداسسکان مون ءِ توننگانے، کرنٹ اکاؤنٹ نسخان کم مسنے و پبلک ڈیٹ ءِ پین پائیدار کہول آ اتنگانے۔ وزیراعظم پاکستان نا صنعت، کشت وکشار و آئی ٹی نا بشخ آتا جدید کاری کن ایگزم بینک انا پدریسہ مخ تفی نا ستاءِ کرے۔ اوجہانی منڈی تیٹی پاکستان نا برآمد آتے مون آدننگ نا کوشست آتا اسہ بشخ اسے نا وڑاٹ پاک چین اسیجائی ڈٹ آتا ڈٹ و واپاری فنانسنگ اٹی چینی ایگزم بینک انا ممکنہ کڑد آ ہم گپ وتران کرے۔ وزیراعظم پارے کہ حکومت پاکستان گورننس نا گچینی خراج نیٹ ءِ ودفنگ و کاروبار کننگ اٹ آسانی نا بابت گام گیج کننگ اٹی ءِ، چائنا ایگزم بینک پاکستان نا زرگزرانی شونداری ٹی اہم کڑد ادا کرینے ، مین ریلوائی لائن۔ 1نا اپ گریڈیشن نا ڈٹ زرکاری کن اسُل تیار ءِ۔ اوپارے کہ کراچی سرکلر ریلوائی نا بحالی کن چینی زرکاری نا خواہندار ءِ، پاکستان تینا کشت وکشار نا بشخ انا کچ ءِ ودفنگ نا بابت چینی آزموندہ غاتیان فائدہ ہرفنگ خواہک، ایگزم بینک نا چیئرمین وزیراعظم تون گپ وتران کرسا پارے ہراوڑ نی پنجاب سپیڈ اٹ کاریم کریس و گچین کارکڑد نشان تسوس ہمووڑنے پاکستان سپیڈ نظربننگ بناکرینے۔ اوپارے کہ پاکستان نا ہر ڈٹ چائنا ایگزم بینک اکن اولیتی حیثیت تخک۔ اوسی پیک فیز۔IIنا رداٹ اقتصادی و مالی کمکاری نا اہم کڑد و چائنا ایگزم بینک انا پاکستان تون اسٹریٹجک شریداری و ’’اسیجائی شونہالی‘‘ نا تصور نا رداٹ پائیدار شونداری ءِ مون آ دننگ کن کمکاری آ زور شاغا۔ چائنا ایگزم بینک انا مسکوہی چیئرپرسن ہوزیاولیان محمد شہباز شریف نا وزیراعلیٰ پنجاب نا دور اٹی اونا چاروکی ٹی ترند رفتار شونداری ڈٹ آتا سوب آن شہباز اسپیڈ نا اصطلاح ءِ کاریم اٹ ایسوسس۔
