بیجنگ۔ 06 جون (اے پی پی) وزیراعظم محمد شہباز شریف تون چائنا انٹرنیشنل ڈویلپمنٹ کوآپریشن ایجنسی (سی آئی ڈی سی اے) نا چیئرمین لوژاؤہوئی اوڑدہی کرے، اوڑدہی ٹی چین پاکستان نا یکتا و پائیدار سنگتی و اسیجائی شونداری،اسٹریٹجک پت و تین پہ تینی فائدہ اٹ چلینگوک آ عملی کمکاری نا پین مون آ دننگ آ گپ وتران کننگا وخت اس کہ سی آئی ڈی سی اے پاکستان اٹ خصوصی اقتصادی زون و جان جوڑی نا بشخ اٹی زرکاری ٹی است خواہی نا درشانی ءِ کرے۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف تون چائنا سی آئی ڈی سی اے نا چیئرمین لوژاؤہوئی پنچ شنبے نادے آ بیجنگ اٹی اوڑدہی کرے۔ اوڑدہی ٹی وزیراعظم چین پاکستان اقتصادی راہداری ڈٹ و پاکستان نا راجی و اقتصادی شونداری کن سی آئی ڈی سی اے نا پبی مخ تفی نا ستاءِ کرے۔ وزیراعظم پارے کہ لوژاؤہوئی نی پاکستان اٹ بطور سفیر تینا زمواری تے جوان وڑاٹ سرتسوس۔ اوپارے کہ نی نئے بیرہ پاکستان اٹ چین نا سفیر ئسوس بلکن نی پاکستان اٹ پاکستان نا گچین سنگت ہم ئسوس و دا جوزہ داسہ ہم قائم ءِ۔ وزیراعظم و چیئرمین سی آئی ڈی سی اے چین پاکستان نا منفرد و پائیدار سنگتی و اسیجائی شونداری، اسٹریٹجک پت و تین پہ تینی وڑاٹ مفید عملی کمکاری نا پین مون آ دننگ آ گپ وتران کریر۔ اوشونداری و سلامتی نا نیام اٹ تین پہ تینی وڑاٹ سوگو تعلقداری آہم گپ وتران کریر۔ چین پاکستان اقتصادی راہداری (سی پیک) ءِ پاکستان و چین نا نیام اٹ سنگتی نا آہنی علامت گوندسا او فک پاریر کہ سی پیک نا رداٹ راجی ا قتصادی شونداری آ اسیجائی ورکنگ گروپ نا مثبت نتیجہ دوئی مسنے۔ اوداپت انا ہم درشانی ءِ کریر کہ ہڑتوم آکنڈآتا الس نا زند و معاش ءِ گچین کننگ کن سی پیک نا فیز IIاٹی کمکاری نا دا رفتار برقرار سلک۔ وزیراعظم پارے کہ ہڑتوم آ ملک آتا حکومت و الس قدرتی آفت و آفت آتا وخت مدام اسہ ایلو تون تفینو۔ اوکوویڈ۔ 19 نا جہانی دین و 2022 آن پد انا نوکاپ آن زہمی علاقہ غاتا پوسکن تفنگ و پولیو ویکسین نا فراوانی ٹی ہم پدتموک ملک و خاص وڑاٹ پاکستان نا کمک ءِ کنگ اٹ سی آئی ڈی سی اے نا اہم کڑد انا ستاءِ کرے۔ چیئرمین سی آئی ڈی سی اے چندی بشخ آتیٹی چین پاکستان کمکاری ءِ پین کڑمب کننگ نا عزم انا درشانیءِ کرے۔ اوبنداوی پنجر نا شونداری، موسمیاتی بدلی نا ردعمل و انسانی وسیلہ غاتا شونداری بشمول بیلٹ اینڈ روڈ انیشی ایٹیو (بی آرآئی) و گلوبل ڈویلپمنٹ انیشی ایٹیو(جی ڈی آئی ) نا رداٹ برجاڈٹ آتیٹی ہڑتوم آ کنڈآتا شریداری ءِ ودفنگ نا گرج آ ہم زور شاغا۔ اوڑدہی ٹی نائب وزیراعظم و وزیر خارجہ اسحاق ڈار، وزیردفاع خواجہ آصف ، بنجائی وزیر ڈٹ بندی احسن اقبال، بنجائی وزیر خزانہ محصولات محمد اورنگزیب، وزیر پیٹرولیم مصدق ملک، بنجائی وزیر حوالکاری و شینکاری عطاء اللہ تارڑ، بنجائی وزیر نجکاری عبدالعلیم خان، وزیراعظم نا خصوصی کمکار طارق فاطمی ئسک بشخ ہلکر۔
