راولپنڈی۔ 05 جون (اے پی پی) پیپلزپارٹی پنجاب نا صدر و مسکوہی وزیراعظم راجہ پرویز اشرف پارینے کہ بروک آ لس گچین کاری تیٹی سرسہبی کن غٹ سرکڑدہ و ورکرآتے متحد، منظم ویکجا مرسا خواری کروئی مریک، پارٹی سرکڑدہ غاک باصلاحیت و باوقار بندغ آتے حکومتی عہدہ غاتیا تعینات کریر ہرافک دے و نن خواری کریر و ورکرآتا است آتیٹی رہینگوک آ پنجاب و خیبرپختونخوا ٹی گورنرنا عہدہ غا فائز مسر، پیپلزپارٹی ءِ سوگو کننگ کن سوشل میڈیا نا فوٹو سیشن آن پیش تمسا حقی وڑاٹ میدان اٹ پیش تموئی مریک۔ داخیال آتا درشانی ءِ راجہ پرویز اشرف تدوک آ دے راولپنڈی ٹی پاکستان پیپلزپارٹی سٹی نا کنڈآن اڈ ہلوک سُوارہ دود آن تران کرساکرے۔ داوخت آ گورنر پنجاب سردار سلیم حیدر خان، گورنر خیبرپختونخوا فیصل کریم کنڈی، قومی اسمبلی نا باسک سیدہ شہلا رضا، زمردخان، عامر فدا پراچہ، پی پی پی راولپنڈی نا راہشون ملک خالد نواز بوبی، بابر سلطان جدون، ملک قاسم ادریس، توقیر احمد عباسی، نمبردار انعام ملک و ملک حماد اعوان آن بیدس پاکستان پیپلزپارٹی نا سد آ کارندہ غاک بشخ ہلکر۔ راجہ پرویز اشرف پارے کہ بلدیاتی گچین کاری تیٹی سرسہبی آن پد بروک آ لس گچین کاری تیٹی سرسہبی دوئی کننگ کینہ ہراڑکن پارٹی نا غٹ کارندہ غاتے خواری و لگن اٹ کاریم کروئی مریک و پارٹی نا تنظیم سازی و رکنیت سازی آ دمدستی کاریم کرسا کچ اٹی ودکی کروئی مریک تانکہ پیپلزپارٹی مچ آملک اٹی جنرل الیکشن اٹی سرسہب مرسا مون آ بس۔ گورنر پنجاب سردار سلیم حیدر پارے کہ پیپلزپارٹی نا سرکڑدہ وجیالہ غاک بیرک ءِ ہرفسا و اودے بڑزکرسا ساہ ہلیرہ انتئے کہ داسہ غٹ سرکڑدہ و ورکرآک منظم و متحدہ مسنو و 100 دے انا ٹاسک سرسہبی اٹ پورو مریک۔
