اسلام آباد۔ 05 جون (اے پی پی) اسپیکر قومی اسمبلی سردار ایاز صادق پارینے کہ پاکستان نا شمار چاگڑدی تغیرات نا منفی اثرآتیان بھاز زیات زہمی مروک آ ملک آتیٹی مریک، کرہ ارض ءِ چاگڑدی تغیرات کون آ مون تروک خطرہ غاتیان بچفنگ کن اجتماعی کوشست آتا گرج ءِ۔ چارشنبے نادے آ جہانی یوم ماحولیات نا وخت آ تینا کلہو اٹی اوپارے کہ دنیا ءِ داوخت آ چاگڑدی تغیرات نا بھلا چیلنج مون تروک ءِ ، چاگڑدی تغیرات نوکاپ، ترند انگا باسنی، خشک سالی انسانی جان جوڑی آ مضر اثرآتا سوب مریک، چاگڑدی بدلی تا سوب جوڑ مروک آ گرین ہاؤسز گیس آتا پیش تمنگ اٹی پاکستان نا بشخ بھاز کم ءِ۔ اوپارے کہ جہانی یوم ماحولیات اڈتننگ نا مسخت کرہ ارض ءِ چاگڑدی تغیرات نا منفی اثرآتیان بچفنگ کن اسیجائی زمواری ءِ تالان کننگ ءِ۔ اونا پاننگ ئس کہ پاکستان اٹ جنگل آتیٹی ودکی و چاگڑدی نظام نا بحالی کن اولیتی بنداوتیا گام گیج کننگ انگ ءِ، پاکستان چاگڑدی تغیرات آن مون تروک خطرہ غاتون مون تننگ کن قابل تجدیدتوانائی نا ذریعہ ءِ تینا کننگ ءِ۔ اوپارے کہ پاکستان نا پارلیمان ءِ پورووڑاٹ گرین انرجی آ گدریفوک آ دنیا نا اولیکو پارلیمان نا شرف دوئی ءِ۔
