بیجنگ۔ 05 جون (اے پی پی) پاکستانی فروزن فش انا اولیکو کھیپ چین نا ڈیہہ سنکیانگ یغور نا کاشغر بالی پٹ آ سرمس۔ دا کھیپ نا چین آآ سرمننگ جہانی واپار اٹی اہم مزل نا پیدواری ءِ کیک۔ چائنا سدرن ایئرلائنز نا جہاز انا کمک اٹ اسلام آبادآن کاشغر آ دروک آ دا کھیپ اٹی کل 774 کلوگرام فروزن سمندری مصنوعات اوار ءِ ہرافتا مالیت 2 ہزار 760 ڈالر ءِ۔ چائنا اکنامک نیٹ (سی ای این) حوال تس کہ دا کھیپ اٹی 81 کلوگرام تازہ گروپر فش (گھسر مچھی) اوار ءِ ہرانا نہاد 744 ڈالر ءِ داٹی 693 کلوگرام فروزن ملٹ فش ہم اوار ءِ ہرافتا کل نہاد 2 ہزار 16 ڈالر ءِ۔ سنکیانگ ہیزاؤ امپورٹ اینڈ ایکسپورٹ ٹریڈنگ کارپوریشن لمیٹڈ نا نمائندہ تانگ لن پارے کہ دا کھیپ کراچی آن کاشغرنا کمک اٹ چین آ گدریفنگ اٹ 3 دے لگا ۔ اوآخبت اٹ روشنا گمان تا اومیت نا درشانی ءِ کرسا پارے کہ فروزن فش انا دا کھیپ انا سرسہبی اٹ چین آ سرمننگ داوڑنا کاروبار ءِ مون آ دننگ نا پت ءِ ودفک۔ اومستی پارے کہ نن پاکستان تون مستی فروزن فش انا درآمد نا ارادہ تخنہ۔
