شینزن۔ 05 جون (اے پی پی) وزیراعظم محمد شہباز شریف پارینے کہ چین نا شونداری ننا غٹ اکن قابل تقلید درور اسے، چین شونداری کن متکن آ وڑوڈول ءِ ہلسا پوسکن آ وڑوڈول ءِ تینا کرے، پاکستانی کمپنیک چینی ماڈل ءِ تینا کیر، تینا گڑاتے گچین وڑاٹ دنیا نا مون آ پیش کیر، حکومت پورو کمک کیک، نن قول کینہ کہ قائد اعظم نا وژن آ عمل کرسا پاکستان ءِ شون ترفنہ، پاکستان آن وڈی خوری و اسمگلنگ نا توننگ کن گچین گام گیج و پنجرجاتی بدلی اتنگ انگ ءِ۔ اوچارشنبے نادے آ چین نا شار شینزن اٹی پاک چین بزنس کانفرنس آن تران کریکہ۔ داوخت آ کانفرنس نا بناٹی پاکستان و چین نا قومی ترانہ ءِ خلنگا۔ داوخت آ تران کرسا وزیراعظم شہباز شریف پارے کہ چین ءِ شاندار بزنس کانفرنس نا اڈتننگ آ مبارکباد پیش کیوہ، گونڈ مد اٹی دا سرسہب بزنس کانفرنس نا اڈتننگ آ پاکستان نا چین اٹی سفیر و چین نا پاکستان اٹی سفیر تون اوار منتظمین آتے مبارکبادی ایتنہ۔ ہڑتوم آملک آتا کاروباری شخصیت آتا داڑے ساڑی گری ہڑتوم آملک آتا نیام اٹ واپاری و دوستانہ تعلقداری تا مون آ دننگ نا ڈیک ءِ دافورم نا غٹ بشخ ہلوک آتے بخیراٹ پانہ۔ اوپارے کہ چین نا شار شینزن گونڈ مداٹی شونداری نا مزل آتے طے کرینے، ننے مستین ءِ پدی ہلسا مون آ ہنوئی ءِ، مستین خڑک اٹ دا ماہی گیر تا چنکو شار اس ئس ولے داسہ دانا جی ڈی پی 500 بلین یوان ءِ۔ اوپارے کہ چین نا شونداری ننا غٹ اکن درور اسے۔ پاکستان نا آبادی 25 کروڑ و ننا جی ڈی پی 380 ارب ڈالر ءِ، ننے داڑآن سبخ ہلنگ نا گرج ءِ۔ چینی سرکڑدہ غاتا وژن نا سوب آن و شی جن پنگ نا ولولہ انگیز کماشی ٹی چین دنیا نا ارٹ میکو بھلا زرگزران و فوجی قوت ءِ ہرا اسہ بھلو سرسہبی اسے۔ ساڑی آ چین پاکستان آن اِرا سال پد جوڑ مس، بنائی اِرادہائی اسکان پاکستان نا زرگزرانی ٹک آک چین آن جوان ئسر۔ چینی صدر شی جن پنگ نا 3 بھلا سرسہبی تا ذکر ءِ کرسا وزیراعظم پارے کہ دا سرسہبی تیٹی کرپشن نا چٹفنگ، 70 کروڑ بندغ ءِ نیزگاری نا کہول آن کشنگ و چینی ورناتے واکدار کننگ اوار ءِ ہراڑآن چین پورو بدل مس ۔ اینو چین دنیا ءِ بھلو کچ اسے ٹی ڈیری و کشاری مصنوعات برآمد کننگ ءِ، او پیدوار ءِ ودفنگ کن متکن آ وڑوڈول ءِ ہلسا پوسکن آ ٹیکنالوجی ءِ کاریم اٹ اتنگءِ۔
