شینزن۔ 05 جون (اے پی پی) وزیراعظم محمد شہباز شریف شینزن اٹی نانشان ون اسٹاپ سروسز سینٹر و شینزن ایگزیبیشن میوزیم نا دورہ ءِ کرے و ہمووخت آ بنجائی وزیر و تعلقدار پاکستانی کمامدارآتے ہی نانشان ون اسٹاپ سروسز سینٹر اتون مذاکرات کرسا پاکستان اٹ داوڑنا پوسکن آ نظام نا جوڑ کننگ کن لائحہ عمل ءِ گڈیکو دروشم اس تننگ نا پارت کرے۔ چارشنبے نادے آ وزیراعظم آفس نا میڈیا ونگ آن جاری بیان نا رداٹ نانشان ون اسٹاپ سروسز سینٹر آ سرمننگ آ شینزن نانشان ڈسٹرکٹ پیپلزگورنمنٹ نا پارٹی لیڈرشپ گورنمنٹ نا باسک و ڈپٹی میئر لی زنہانے وزیراعظم ءِ بخیرکریر۔ نانشان ون اسٹاپ سروسز نا ددورہ ٹی وزیراعظم ءِ کمپنی تا اسہ ہی چھت انا کیرغ آن رجسٹریشن و ایلو کارروائی تا بابت ڈیجیٹل نظام آ سرجمی اٹ حوال تننگا۔ وزیراعظم نانشان ون اسٹاپ سروسز اٹی کمپنی و کاروبار نا رجسٹریشن کن پوسکن آ نظام نا ستاء کرے۔ وزیراعظم وزیر مملکت انفارمیشن ٹیکنالوجی شزہ فاطمہ خواجہ، سیکرٹری انفارمیشن ٹیکنالوجی و ایلو تعلقدار کمامدارآتے پاکستان اٹ داوڑنا نظام اس درستی راستی کرفنگ کن دمدستی وڑاٹ نانشان ون اسٹاپ سروسز نا کمامدارآتون مذاکرات کننگ نا پارت کرے و اوچینی کمک اٹ پاکستان اٹ دمدستی وڑاٹ داوڑنا سینٹرآتا جوڑ کننگ کن پاکستانی کمامدارآتے المی گام گیج کننگ نا پارت کرے۔ وزیراعظم پاکستانی کمامدارآتے شاری تے بنداوی آسراتی فراوان کننگ کن ہنداوڑنا ہی پوسکن وترندتر نظام اس درستی راستی کرفنگ نا پارت ہم کرے۔ وزیراعظم شینزن نا ارتقاء و شونداری نا بابت جوڑ شینزن ایگزیبیشن میوزیم نا ہم دورہ ءِ کرے۔ دورہ ٹی وزیراعظم ءِ شینزن نا شونداری نا بارواٹی سرجمی اٹ حوال تننگا۔ وزیراعظم میوزیم نا چندی بشخ آتا دورہ ءِ کرےو شینزن نا گونڈ مداٹی شونداری نا سفر نا ستاءِ کرے۔
